JAMITA MINGGU 23 APRIL 2023
DIPAIMBARU ASA MANGOLU DI BAGASAN SANGKAP NI DEBATA
1 Petrus 1:17-23
Jamita Minggu 23 April 2023
Minggu Misericordias Domini
Misericordias Domini - Lat. Misericordias Domini in æternum cantabo artinya aku hendak menyanyikan kasih setia TUHAN selama-lamanya (sai endehononhu ma angka asi ni roha ni Jahowa salelenglelengna) (lihat Mazmur 89:2).
TURPUK
PATUJOLO
Surat sada Petrus i ma surat na ditujuhon tu huria na marserak, na adong di Pontus, Galatia, Kappadosia, Asia dohot Bitinia (ayat 1). Tujuan ni surat on digurithon jala ditongoshon tu huria na marserak i, asa paingothon huria i di ruhutruhut ni parange na denggan tudos tu pangalaho ni Kristus songon ulu ni huria. Sahat do huria i tu ngolu na marragam hamaolon, pangunjunan nang angka godang ni haporsukon. Diadopi nasida do ragam ni na masa, partontangan, hinahansit, halumlamon dohot angka lan na asing dope.
Surat sada Petrus on mangalehon bohal, asa tama halak Kristen marpangalaho songon parbue ni haporseaon na mansorminhon ngolu ni Kristus. Asa songon halak na boi tiruan nian halak Kristen i marhite pangalaho na denggan jala na marojahan di bagasan holong. Songon angka apostel i na mambahen Jesus gabe tiruannasida. Halak Kristen ingkon boi do patuduhon haporseaonna marhite pambahenan dohot pangalaho na di bagasan biar jala unduk tu Debata, huhut boi papatarhon ngolu na marholong ni roha na manongtong, ias, jala uli tu dongan jolma. Halak Kristen mansai porlu do mangolu di bagasan holong ni roha, ala sian holong ni roha i do na gabe hataridaan ni pangalaho paboa siihuthon Kristus hita.
HATORANGAN
1. Marhatahuton marparange di tingki paisolaton (ayat 17)
"Molo Ama digoar hamu Ibana." Didok Ama dison, paboa Debata do i na gabe Ama ni saluhut bangso na di portibi on, na mangolu di bagasan habadiaon. Dihatindanghon si Petrus do i asa margogo jala patoguhon angka halak Kristen asa gabe parsidohot nasida marpangalaho habadiaon. Ingkon parateatehononta do songon dia hita marpangalaho.
Ama na nidokna dison, i ma "Ama na manguhumi nasa jolma marguru tu pambahenanna." Didok manguhumi paboa na ro do panguhuman parpudi ni Debata Ama tu saluhut bangsoNa. Alai dohot do nang masa panguhuman na taripar di ganup gulmit ni ngolu ni angka jolma i. Dihaholongi Ibana do sude angka ianakhonNa, jala diparade Ibana do hatuaon tu nasida, asa hatuaon i gabe parjambaran di ganup ngolu ni na porsea di Ibana jala na mardalan di bagasan pangaramotion dohot Hata ni Debata. I ma balga ni holong ni Debata Ama i. Holong na so marpangansi do dibahen tu jolma i.
"Marhatahuton ma hamu marparange di tingki paisolatanmuna." Dihatindanghon si Petrus do, paingothon angka jolma i, molo ngolu di portibi on holan parsatongkinan do. I do asa didok paisolat/ menumpang. Alai, ngolu na marpaisolat i do na manontuhon ngolunta di bagasan habadiaon sogot. Atik na jaloonta do ngolu habadiaon manang ndang. Molo naeng hita manjangkon ngolu si saleleng ni lelengna i, didok si Petrus asa marhatahuton ma hita uju di portibi on dope. Didok mabiar ala i ma songon parbue ni holongta tu Debata dohot panandaionta na sintong tu Panompa na sun gogo i. Ngolu na marhatahuton dipatuduhon ma i marhite pangalaho na unduk tu Debata Ama, ngolu na marpanghirimon tu Ibana di sude gulmit ni parngoluon.
2. Ditobus marhite mudar ni Kristus (ayat 18-19)
Boasa didok si Petrus asa marhatahuton tu Debata? Marhatahuton asa dapotan pasupasu do manang asa mandapot haluaon? I do sasintongna. Saluhut halak na unduk jala marhabiaran tu Debata sai dapotan haluaon do nasida. Dipasupasu jala ditobus marhite mudar na mansai arga. Panobusion i, i ma na tinuhor sian parhatobanan. Di Johannes 8:34 didok, "dung i didok Jesus ma mangalusi: na tutu situtu do na Hudok on tu hamu, hatoban ni dosa do ganup na mangula dosa." Sian na nidok ni Jesus on, patar ma naung dirajai jala diparhatoban dosa do jolma i. Dosa na mamparhatobanhon halak, tarida do i sian ngolu ni jolma i.
Umbahen i do, disangkapi Debata ma asa paluahon jolma i sian parhatobanon ni dosa. Dilehon do AnakNa, i ma Tuhan Jesus Kristus, gabe panobusion ni dosa. Jala holan i do dalan di jolma i asa boi gabe naposo ni Debata.
Panobusion na nidok si Petrus dison, i ma panobusion "sian adat na so marniula, na tinean sian angka ama na parjolo." Tangkas do on patuduhon ngolu na mardosa. Didok na so marniula papatarhon ngolu nang pangalaho na ramun, ndang marguna jala digohi angka panghirimon na so marguna, na so mararga di jolo ni Debata. Ditobus jolma i, "ndada binahen ni sere manang perak, angka na olo buruk, alai binahen ni mudar ni Kristus na arga i do, na songon mudar ni birubiru na so hasurahan, na so marlindang." On ma na patuduhon paboa ndang adong na boi manobus hita sian dosa so holan marhite mudar ni Tuhan Jesus Kristus na songon mudar ni birubiru na so hasurahan dohot na so marlindang. Jala on do na papatarhon tu hita, holan marhite Kristus i do digohi i ma na nidokna birubiru di Padan na Robi. Kristus di Padan na Imbaru pataridahon haluaon na so marpangansi saleleng ni lelengna. On ma na gabe sipeoponta, haluaon na dipasahat Tuhan Debata tu hita jolma asa dapotan jambar hangoluan ro di saleleng ni lelengna.
3. Jesus ditodo tagan so ojak dope portibi on (ayat 20)
"Naung ditodo do Ibana hian tagan so ojak dope portibi on." Jesus Kristus ma na tinodo ni Debata andorang so ditompa dope portibi on. Jesus Kristus do na tinurpukhon ni Debata laho patulushon aha na hinalomohon ni rohaNa di portibi on. Sangkap ni Tuhan i di na laho manobus dosa ni jolma i ndang na ulaon na tompu manang sangkap na tarhipu. Alai sangkap panobuson i nunga adong andorang so adong dope portibi on ditompa Debata.
Hamatean dohot haheheon ni Kristus i pataridahon ndang na muba sangkap ni Debata. Naung dipapatar hian do i jumolo di bagasan sangkap ni Debata Ama. Asa dapotan haluaon dohot hangoluan angka na porsea di Ibana marhite Jesus Kristus.
4. Porsea di Debata marhitehite Jesus (ayat 21)
"Marhite Ibana do dihaporseai hamu Debata." Ibana na nidokna dison i ma Jesus. Ndang boi tarjalo hita haporseaon na mangolu jala ndang tarjalo hita asi ni roha ni Debata so holan marhite Jesus. Ala ni i, tung tama do hita marningot Jesus songon "suman ni Debata na so tarida i, na parjolo tubu sian nasa na tinompa" (ida Kolosse 1:15). Kristus do na gabe dalan ni angka jolma i asa sahat tu Debata. Holan Kristus do na boi pamonanghon dohot pasonanghon rohanta, gabe boi hita ro tu adopan ni Debata marhite haporseon na manongtong maradophon Ibana. Ala ni i, tardok ma hita angka ianakhon na hinaholonganNa.
Dihatindangkon si Petrus do taringot tu haheheon dohot habadiaon ni Kristus i. Asa adong ojahan ni haporsean na togu di saluhut jolma i. Marhite panobuson ni Kristus i, nunga dijangkon Debata Ama hita di bagasan asi ni rohaNa. Hinorhon ni i do umbahen na hehe Jesus di bagasan habadiaonNa i. Hombar tusi, lam tama ma hita mandok mauliate tu Debata marhite haporseaon dohot panghirimon na mangolu maradophon Ibana.
5. Paias roha jala masihaholongan (ayat 22)
"Paias hamu ma rohamuna, marpangoloion di hasintongan." Pangurasion dohot haundukon tarula, ndang ala ni hagogoonta, alai marhite Tondi Parbadia do. Ingkon tarajumi do on, ala ni pangurupion ni Tondi Parbadia i do umbahen na boi hita dibadiahon jala diurasi, ndang ala ni parulanta. Ala ni i, halak Kristen ingkon do martangiang di bagasan panghirimon na mangolu di partondion, jala radot mangido gogo sian Tondi i asa diurupi hita di sude gulmit ni parngoluan.
"Mangeahi haholongon na so marlaok di dongan, asa masihaholongan situtu hamu sian nasa roha." Holong pardonganon diterjemahkan do i sian hata Junani, sian hata philadelphia, na marharoroan sian hata phileo (lapatanna - cinta) manang philia (lapatanna - kasih) dohot hata adelphos (lapatanna saudara). Na marlapatan ma i holong na so marpangansi, holong na so marimbar, holong na sintong maradophon dongan. On ma na patuduhon holong ni halak Kristen songon holong ni Kristus Jesus tu saluhut jolma marhite na mate Ibana di hau pinorsilang i. Di Johannes 13:34-35 didok, "Patik na imbaru ma hulehon tu hamu: naeng ma masihaholongan hamu, songon holong ni rohangKu di hamu, naeng ma songon i dohot hamu masihaholongan."
Mansai godang do halak na masihaholongan, alai holan di parnidaan do nasida masihaholongan, isarana: dipataridahon bohi na minar dohot hatahata na lambok dohot lan na asing. Alai molo di rohana marasing do. Songon i ma holong na marpangansi. Alai holong na nidok ni si Petrus dison i ma holong na so marlaok di dongan huhut masihaholongan situtu sian nasa roha. Jala dipatudos si Petrus do holong i songon holong agape lapatanna holong na so pajolohon diri, manang holong na so marparbuat. Holong agape on ma na ingkon sipeopon ni saluhut halak Kristen. Dipatudos do holong agape on tu holong ni Debata, na tubu sian Debata marhite panandaion di Debata jala Debata do holong i (ida 1 Johannes 4:7-8).
6. Mangulahi tubu marhite Hata ni Debata (ayat 23)
"Ai nunga mangulahi tubu hamu, ndada sian boni na olo basebasean, sian na manongtong do. Binahen ni hata na mangolu jala na mian i, na sian Debata." Dipatudos si Petrus do songon posoposo na imbaru tubu halak Kristen. On ma gabe sada panindangion asa boi angka na porsea i gabe halak naung diurasi, ias jala imbaru di bagasan Tondi. Ndang songon boni na olo basebasean, sega jala busuk. Alai boni na sintong do, na sian Debata Ama, i ma holong ni roha naung dilehon tu bagasan ngolu ni angka na porsea di Ibana. Marhite Hata ni Debata, na pangoluhon na porsea, mian ma di rohanasida holong na so marpangansi i. Dihatindangkon si Johannes do di 1 Johannes 3:9 "ganup naung tubu sian Debata, ndang mardosa; ai na mian do di bagasan ibana boni i. Ndang tarbahensa mardosa, ai nunga tubu sian Debata ibana." Songon i ma halak naung disonggopi hata ni Debata si Pangolu i. Gabe mulak imbaru do angka jolma na porsea di Ibana.
HAHONAAN
Turpuk Jamitanta sadari on paandarhon angka ruhutruhut na ringkot sipaihutihuton ni halak Kristen marpangalaho di ngolu si ganup ari hombar tu haimbaruon naung jinalo sian Debata. Tapeop ma di bagasan ngolunta:
1. Holong ni roha na polin.
Holong ni roha na polin i ma sada gogo asa manghaholongi donganna di na lobi manang na humurang. Isarana ndang gabe mandele baoa manang boruboru, ama manang ina molo jumpang hahurangan di donganna sabagas. Godang do jolma na tarsar goarna di portibi on, tung boha pe hajagoonna, sai adong be do hahuranganna. Olo ma hahurangan i sian pardagingon, parrohaon, parangena dohot ulaonna. Di na sabagas pe ndang gabe mandele sahalak ina molo tung diboto hahurangan ni amantana, songon i do nang baliksa. Halak Kristen ingkon do mandalani ariari ni ngoluna di bagasan habadiaon marpangalaho nang parange na tama maradophon Debata nang dongan jolma.
Sada na ingkon sitioponta i ma, tongtong ma hita marroha mauliate di angka pasupasu na tajalo sian Tuhan i. HagogoonNa i do na mangurupi hita mandalani partingkian na tabolus. Taargahon ma Hata ni Debata naung mian di rohanta be. Ngolu na marhaimbaruon di tongatonga ni halak Kristen hombar do i tu poda ni Tuhan Jesus. Boi do adong angka perbedaan di tongatonga ni ngolunta, di huria, di partingkian nang di humaliangta. Alai taingot ma, saluhut do hita songon hapataran ni pamatang ni Kristus. Ala ni i, ingkon di bagasan hasadaon ni roha do do hita laho patupahon holong i, marhite ngolu na saroha jala sapangkilaan.
2. Pangoromion di diri.
Somalna adong do tolu bangko ni hajolmaon na jotjot tarida di ngolu si ganup ari. Na parjolo, mangulahon na jat balos ni na denggan. Na paduahon, patupa na denggan balos ni na denggan. Na patoluhon, patupa na denggan balos ni na jat. Poin na patoluhon on ma hadirion ni halak Kristen. Patupa na denggan balos ni na jat. Ai dipangido do halak Kristen i asa gabe pasupasu. Asa boi tu parange na si songon on, ingkon adong do pangoromion di diri. Diorom ma diri marhite unang marhata na so denggan manang manginsahi dohot angka lan na asing dope.
Tarjou do halak Kristen asa marpangalaho na denggan, asa gabe pasupasu tu na humaliang halak. Ala ni i, ingkon do pangoromion di diri, unang madabu tu ulaon na so tama di adopan ni Tuhan i. Asa lam tang haporseaonta jala sai marpangunsadean tu Tuhan i ma ngolunta. Tapatuduhon ma angka parbue ni pangalaho na marhaimbaruon jala tahangoluhon ma naung tangkas panandaonta di saluhut pambahenan ni Debata. Taingot ma Misericordias Domini, "Sai endehon ma angka asi ni roha ni Jahowa." Taendehon ma angka asi ni roha ni Jahowa marhite panindangion na mangolu, marojahan tu roha na marhamauliateon mamuji hatimbulon ni Tuhan i. Tahangoluhon ma haimbaruon i jala mangolu ma hita di sangkap ni Debata. Amen. (ump)
Posting Komentar