JAMITA MINGGU 16 APRIL 2023
DITUBUHON PADUAHALIHON MARHITE HATA NI DEBATA
Hesekiel 36:22-27
Jamita Minggu 16 April 2023
Minggu Quasimodogeniti
Quasimodogeniti - Lat. sicut modo geniti artinya sama seperti bayi yang baru lahir (songon posoposo na imbaru tubu) (lihat 1 Petrus 2:2a).
TURPUK
"Dibahen i dohononmu ma tu pinompar ni Israel: Songon on do hata ni Tuhan Jahowa: Ndada ala hamu Ahu mambahen songon i, ale pinompar ni Israel, ala ni goarHu na badia i do, na niramunanmuna di tongatonga ni bangso parbegu, angka hasahatanmuna i. Jala Ahu ma pabadiahon goarHu na timbul i, naung niramunan di tongatonga ni angka bangso parbegu, na niramunanmuna tahe di tongatonganasida, asa tung ditanda angka bangso parbegu, Ahu do Jahowa," ninna Tuhan Jahowa, "ia dung Huparbadiai diringKu di bagasan hamu di adopanmuna. Jala Ahu mambuat hamu sian angka bangso parbegu, jala paluhutonHu do hamu sian saluhut angka luat, jala boanonHu do hamu mulak tu tanomuna i." "Dung i urashononHu ma tu hamu aek angka na tio, asa tung ias hamu; urasonHu do hamu tahe sian saluhut haramunonmuna i dohot sian saluhut ganaganaanmuna i. Jala lehononHu tu hamu roha na imbaru dohot tondi na imbaru tu bagasan ateatemuna; jala unsatonHu do roha batu sian dagingmuna, jala lehononHu tu hamu roha sibuk. Jala lehononHu ma tondingKu tu bagasan ateatemuna, jala Ahu mambahensa, asa marparange hamu di bagasan angka patikHu, angka uhumHu pe radotan jala patupaonmuna do."
PATUJOLO
Turpuk ni Jamita di Minggu Quasimodogeniti 16 April 2023 tarsurat di Buku Hesekiel. Hesekiel i ma sahalak naposo ni Debata na tarjou asa manurirangi jala pasahathon Hata ni Debata di tongatonga ni bangso ni Debata. Hesekiel marlapatan "Debata na mampargogoi." Hesekiel i ma anak ni malim Busi, di tano ni halak Kasdim, na manghobasi di Jerusalem (ida Hesekiel 1:3). Uju na tarbuang Israel tu Babel dohot do panurirang Hesekiel tarbuang tu Babel rap dohot panurirang Daniel (ida Daniel 9:2).
Hatiha di Babel ditanda na torop i do Hesekiel sahalak jolma ni Debata na manurirangi (ida Hesekiel 14 dohot 28). Mangoli do si Hesekiel songon halak Jahudi na asing na di habuangan, jala maringanan martopihon batang aek Hebar (ida 1:1, 3:15-24, Psalmen 137:1). Jala dijalo ibana panjouon gabe panurirang hatiha di habuangan Babel di topi batang aek Hebar.
Buku Hesekiel on marisi 48 bindu jala adong mar 1273 ayat. Hurang lobi buku on digurithon hirahira taon 590-570 andorang Jesus di Jehuda dohot di Babel. Ondolan ni buku Hesekiel i ma: panguhuman jala hamuliaon ni Debata, rimas dohot holong ni Debata.
HATORANGAN
Turpuk ni Jamitanta sadari on paboahon parngoluon ni bangso Israel uju na tarbuang nasida tu Babel. Hatiha i adong pangantusion na lilu di bangso Israel. Dirajumi nasida angka na masa di parngoluon nasida, ala ni nasida do umbahen na marpangulahi Debata di angka hajahatonnasida. Dirimpu nasida do ala hadirion nasida umbahen na marpangulahi roha ni Debata di hajahatonnasida. Hape ndang ala ni i asa marpangulahi roha ni Debata.
Laho patigorhon pangantusion nasida na lilu i, ro ma Hata ni Debata marhite panurirang Hesekiel. Dipasahat Debata alana boasa marpamuati rohaNa. Didok "ala ni habadiaon ni goarNa do Debata patupahon pambahenanNa i." Hape halak Israel sandiri, diramuni nasida do goar ni Debata di tongatonga ni angka bangso parbegu. Diramuni lapatanna dipangke nasida goar ni Tuhan i tu angka pangalaho manang hinaringkot di haportibion, hisap ni daging dohot angka hagiot ni haportibion. Isarana, hisap ni portibi on do tujuanna, alai dipangke nasida Goar ni Debata asa porsea halak jala boi dapot hagiot ni dagingna i. I do umbahen na tarrimas Debata di pambahenan nasida i. Alai tarrimas pe Debata tu bangsoNa, dalan ni Debata do i laho pabadiahon goarNa na sun timbul i, naung niramunan ni halak Israel di tongatonga ni bangso parbegu. Molo nunga diparbadiai Debata goarNa, mulak ma muse roha ni Debata tu bangsoNa i laho paturehon bangsoNa i muse.
Molo tarimangi turpuk on, taboto ma sai na boi do oromon ni Tuhan i rimasNa molo adong angka hahuranganta. Alai baliksa marrimas do Tuhan i molo taramuni goarNa di adopan ni bangsobangso parbegu (ida ayat 6). Molo taulahon ulaon na mangaramuni goar ni Debata, marhite na mamangke goarNa tu dalan na so patut, ndang tarorom ni Debata rimasNa, sandok ingkon ro do panguhumanNa. Molo tung marrimas pe Tuhan i ndada laho pasombu muruk, hira jolma na muruk, molo muruk jolma jala tarrimas, gabe manghorhon muruk na so marimpola, na holan papuas na di roha. Alai di bagasan rimas ni Tuhan i, i ma gabe sada dalan laho mangurasi dosa ni bangsoNa i. Marpangulahi do muse roha ni Debata laho patureturehon bangsoNa na tangkang marroha.
Sada sitiruon do on tu hita jolma. Asa molo tung muruk pe hita unang ma holan laho papuas mohop ni roha, alai ingkon adong do dalan laho mamboan tu hadengganan di angka na humurang. Jala molo di na muruk pe hita unang ma torus di bagasan mohop ni roha, ingkon adong do roha marpangulahi jala marpamuati songon na binahen ni Debata tu hita jolma. Ia Debata, dung salpu murukNa i tu bangsoNa na tangkang i, diurasi do bangsoNa i, luhut do nasida diboan Debata bangsoNa i mulak tu tanonasida.
Di turpuk Jamitanta sadari on dipaboa Debata do, paboa marhite aek na tio do urason ni Debata bangsoNa na tangkang i, na jotjot madabu tu dosa ni ganaganaan. Diurasi marhite aek na tio lapatanna dipatio marhite aek na diparbadiai. Di bagasan aek i mian Goar ni Debata na sun badia jala na timbul. Aek na tio dison patoranghon aek pandidion. Nasa na dididi di bagasan aek pandidion, na di bagasan Goar ni Debata Ama, Anak dohot Tondi Parbadia, nunga be diurasi jala dipaias Debata ibana sian angka dosana.
Nasa naung diurasi marhite aek pandidion i dapotan roha na imbaru dohot tondi na imbaru ma. Roha dohot tondi na imbaru, tarida ma i marhite angka parbue ni Tondi na sinurathon ni Apostel Paulus di Galatia 5:22-23. Diondolhon turpuk on do muse, molo naung mian do Tondi i di bagasan jolma i, parbuehononna ma angka parbue ni Tondi di bagasan ngoluna. Gabe tarbahen jolma i ma laho mangaradoti manang patupahaon angka uhum dohot Patik ni Debata. Molo didok mangaradoti lapatanna mangingot, mameop jala manghangoluhon. Molo didok mangaradoti ingkon do dihangoluhon jala dipardaginghon angka uhum dohot patik ni Tuhan i.
HAHONAAN
Goar ni minggunta sadari on i ma Quasimodogeniti, lapatanna songon posoposo na imbaru tubu, na uasan di susu na tama. Naeng ma songon i hita angka na porsea, songon posoposo ma hita di adopan ni Debata, na uasan di Hata ni Debata, jala marsigantung tu si ma ngolunta, angka na porsea. Hombar tu ojahan ni minggu sadari on, "Ditubuhon Paduahalihon Marhite Hata ni Debata" aha do lapatan ni Hata ni Debata na nidokna dison?
Di Johannes 1:1 dohot 14 didok, "Di mulana i nunga adong Hata i, jala saor tu Debata do Hata i, jala Debata do Hata i. Gabe daging ma Hata i jala maringan di tongatonga ni hita on, jadi huida hami ma hasangaponNa, i ma hasangapon ni Anak sasada na sian Ama i, gok asi ni roha dohot hasintongan." Sian on botoonta ma Jesus do na nidokna Hata ni Debata i, na tolap patubuhon jolma pardosa i paduahalihon. Jala molo didok ditubuhon paduahalihon lapatanna asa sahat do tu hambuaon ni roha na sintong dung tajalo pangurasan na sian Debata marhite aek pandidion jala di naung dididi rohanta marhite Tondi ni Debata. Amen. (ejs)
Posting Komentar