EPISTEL MINGGU 14 MEI 2023
UNANG HOLSOAN HAMU AGIA AHA
Jona 2:1-10
Minggu Rogate
TURPUK
Dung i diparo Jahowa ma sada ihan raya asa dibondut si Jona. Jadi di bagasan butuha ni ihan i ma si Jona tolu ari tolu borngin. Dung i martangiang ma si Jona tu Jahowa Debatana, sian butuha ni ihan i. Jala didok ma: "Joujou do ahu sian hagogotanhi tu Jahowa gabe dialusi Ibana ahu. Sian butuha ni parbeguan ahu mangangguhi: Ditangihon Ho do soarangki. Nunga direonghon Ho ahu tu bagasan lung tu bagasan pusupusu ni laut, gabe pusat manghaliangi ahu, sude angka ombakMi dohot galumbangMi mangalungkupi. Ianggo ahu, nunga hudok: Nunga bali ahu sian jolo ni mataM; alai tahe ulahanhu dope mamereng dompak joro habadiaonMi. Nunga nian dihaliangi angka aek i ahu, pola tos hosangku, lung i pasampaksampak ahu sirambon do alit tu ulungku. Nunga mangungkor ahu sahat tu bona ni angka dolok, ransangransang ni tano on pe nunga tarsordak humaliang ahu ro di salelenglelengna. Alai dipanangkok Ho ngolungku sian godung ale Jahowa Debatangku. Uju mandate hosangku di bagasan, Jahowa ma huingot, jadi sahat ma tangianghu tu Ho, tu joro ni habadiaonMi. Alai halak na marsomba tu ganaganaan sipaotooto, i ma na manadinghon hasonangannasida i. Alai anggo ahu mardongan soara pujipujian ahu mamele tu Ho, gararonhu do na huparbagabaga, Jahowa do nampuna hatuaon."
PATUJOLO
Ngolu ni jolma ndang boi tarsirang sian uhum na mandok dos do nangkokna jala dos do nang tuatna. Aha na binahen ni jolma i, laos i do nang jaloonna. Molo tung pe masa angka na masa di ngolunta on, tontu adong sibonsirina. Marhite i, boi do idaonta angka naung taulahon di angka ari naung salpu. I do na mambahen hita boi sahat tu ngolunta si nuaeng on.
Songon i do nang na masa di Panurirang Jona. Tangkas do taboto marhite Buku na Badia i taringot tu Panurirang Jona, na dibondut ihan raya ibana di pardalananna, di na maporus ibana tu Tarsis maradophon Jahowa. Manimbil panurirang i sian parsuruon na pinasahat ni Debata tu ibana.
Disuru Debata do panurirang i laho martingting dompak Ninive ala nunga pola maungaung hajahaton ni bangso i sahat tu jolo ni Debata. Disangkapi Debata do asa malua bangso Ninive i sian uhum dohot rimas ni Debata. Umbahen i do asa ro hata ni Jahowa tu si Jona asa martingting ibana dompak huta Ninive. Alai, di mula na i ndang tarjalo roha ni si Jona sangkap ni Debata i. Ndang satolop si Jona di angka naung tinontuhon ni Debata. Ndang tarjalo ni si Jona molo tung dipalua Debata nasida. Umbahen i do asa laho ibana maporus tu Tarsis maradophon Jahowa, didok rohana asa unang tung dipalua Debata halak Ninive.
Alai disundati Jahowa do sangkap ni si Jona i marhite na ditompuhon Jahowa habahaba siapalautus tu laut i. Gabe mabiar do halak parparau i, mangangguhi nasida tu debatana be. Huhut direonghon nasida angka ulaula na di bagasan parau i tu laut asa tung neang teaon ni parau i asa unang harom nasida. Molo nasida nunga be mabiar situtu, alai si Jona mijur do ibana tu pamurnangan ni parau i laos diparedem modom. Nunga mansai mabiar situtu nasida alai modom do ianggo si Jona, laos didapothon induk ni parparau i ma ibana laos dipangido asa martangiang ibana tu Debatana asa tung dipalua nasida, asa unang harom parau i. Ditorushon nasida do muse marhopok, asa tung tarboto manang ala ni ise umbahen na ro parmaraan i tu nasida. Jala laos tarboto ma, ala ni si Jona do hape asa ro parmaraan i tu nasida. Ala maporus ibana maradophon Jahowa.
Mardos ni roha ma nasida asa dihindat ma si Jona jala direonghon angka na di parau i ma si Jona tu laut i asa malua nasida na di parau i. Laos so ma laut i sian gunsangna. Dung dipahindat dohot direonghon si Jona tu laut i dibondut ihan raya ma ibana. Di si ma ibana martolu ari tolu borngin. Martangiang ma si Jona tu Jahowa Debata sian butuha ni ihan i, nunga tung hansit dihilala ibana jala diingot ibana pardengganbasa do Jahowa laos dipasahat ibana anggukna tu Debata. I ma hamubaon na masa tu ngolu ni si Jona.
Marhite na masa di ngolu ni si Jona on, aha ma sipeopon sangkap ni Debata di ngolunta? Molo ro hagogotan tu hita, lumobi ma ala ni parulaonta, songon dia do sikapta? Aha do hamubaon na masa di ngolu ni si Jona? Jala, aha do na boi peoponta sian hamubaon ni si Jona i tu hita na mangolu di partingkian si nuaeng on? Aha do alus ni Jahowa di hamubaon i? Angka sungkunsungkun on ma na boi mangurupi hita laho manghangoluhon dohot mangauhon turpuk ni Epistel on di parngoluonta si saonari.
HATORANGAN
1. Pangarimangion na mamparbuehon hamubaon ni roha (ayat 1-7).
Dung di bagasan butuha ni ihan raya i si Jona manigor martangiang do ibana tu Jahowa, jala molo tabereng di turpuk ni Epistel on tung tangkas do pangarimangion ni si Jona. Joujou do ibana di bagasan hagogotanna tu Jahowa pola sampe mangangguhi. Dirimangi ibana do na Jahowa do mangareonghon ibana tu bagasan pusupusu ni laut i. Diauhon ibana do nunga bali ibana sian jolo ni mata ni Jahowa. Dihaliangi aek i do si Jona, pola tos hosana, jala lung i pasampaksampakhon ibana. Marungkor do ibana sahat tu bona ni angka dolok, ransangransang ni tano pe tarsordak humaliang ibana salelenglelengna.
Sian angka na pinajojorna di tangiangna i, i ma na patuduhon na adong do pangarimangion di ibana di angka naung niulana; na manimbil ibana sian parsuruon ni Debata. Alai dung dipajojor ibana pangarimangionna i, manigor udut do patuduhon panolsolion ibana, marhite angka pandohan di tangiangna na mandok: "Ditangihon Ho do sorangki" (ayat 2), "alai tahe ulahananhu dope mamereng dompak joro habadiaonMi" (ayat 5) jala "dipanangkok Ho do ngolungku sian godung ale Jahowa" (ayat 7). Molo sian parrohaon, boi do taboto songon dia sega ni roha ni si Jona di pambahenanna di na manimbil ibana sian Debata. Alai ndang olo ibana torus di bagasan sega ni roha, tung manolsoli do ibana, pola sahat tu na mangangguhi.
Molo pe adong pangarimangion di hita, molo tabereng do si Jona, ndada holan pangarimangion i na ingkon adong di hita, ingkon adong do nang panolsolion. Molo adong pangarimangion di angka hasalaanta, ingkon saurdot do nang dohot panolsolion. Ala ni i, ndang marlapatan pangarimangion i molo ndang adong panolsolion. Jala ndang boi masa panolsolion molo so jumolo adong pangarimangion di angka hasalaanta. Ndada holan sahat tu na dua naung didok i, alai ingkon adong do nang udutna. Tapabagas ma nang udutna i di ayat 8-10.
2. Padan hamubaon ni roha tu Debata (ayat 8-10).
Dung sahat si Jona tu panolsolion i, manigor dipatupa ibana do padan tu Debata marhite hamubaon ni roha. Dihatindangkon ibana do na Jahowa do na diingot jala dipuji ibana jala Jahowa do nampuna hatuaon. Ia padan hamubaon ni roha tu Debata na nidok ni si Jona, marharoan do i dung masa pangarimangion dohot panolsolion. Sian angka na masa di si Jona on, ingkon adong do tolu na ringkot masa di hita molo tung jumpang hagogotan ala ni hasalaanta, ala ndang unduk hita tu parsuruon ni Debata. Na tolu i, i ma pangarimangion, panolsolion dohot padan. Ndang boi tarsirang na tolu i. Ndang boi tadok padanta tu Debata, molo so adong na dua nari, suang songon i do nang baliksa.
Boi do tajalo haluaon sian Debata molo marsala hita? Sian na masa di si Jona on, idaonta ma: boi do jaloonta haluaon i, alai taargahon huhut taulahon ma na tolu i asa tung dapotta haluaon i.
HAHONAAN
Marhite turpuk ni Epistel di Minggu sadari on di Minggu Rogate, na marlapatan ale Jahowa, sai tangihon ma tangianghi, patinggil pinggolMu umbege anggukhon, aha ma na boi sipeoponta na laho gabe bohal di tongatonga ni ngolunta? Marhite turpuk ni Epistel on, tarimangi ma:
Na parjolo, adong do sada ende ni Singkola Minggu na manghatahon taringot tu na masa di Panurirang Jona. Didok di hata ni ende i: "Yunus di perut ikan. Karena dia dikasihi Tuhan maka dia dibebaskan." Sian hata ni ende i boi do tabereng boha panghaholongi ni Debata tu si Jona, nang tu hita na mangolu di bagasan partingkian si saonari.
Na paduahon, molo pe ro hagogotan, jala ala ni hita sandiri do asa masa i, hatop ma ro hita tu Tuhan Jesus marhite tangiangta. Jala taingot ma: unang ma adong hita na patigorhon diri di tangiangta i. Tabereng ma di tangiang ni si Jona, na so olo ibana patigorhon dirina di adopan ni Debata, ala tangkas do diboto ibana ala ulaonna do umbahen na gabe dibondut ihan raya ibana.
Na patoluhon, unang ma manimbil hita patupahon parsuruon ni Debata. Angka ragam ni ulaonta si ganup ari, i ma na gabe dalan di hita laho patupahon parsuruon ni Debata tu hita. Tahangoluhon ma, sai na adong be do hatandianna molo marningot parsuruon ni Debata. Lapatanna, ndang sarupa parsuruon ni Debata tu hita be, isarana di ianakhon manang natoras jala ndang sarupa parsuruon ni Debata di angka na mangula ulaon di balian manang na di ulaon kantor. Adong be do parsuruonta na dipasahat Debata. Ala ni i, sotung manimbil hita di angka parsuruon naung pinasahatNa i tu hita. Molo manimbil hita sian parsuruon naung pinasahatNa tu hita, sotung ro rimas ni Tuhan i tu hita. Las ma rohanta jala di bagasan hahipason ma hita mangulahon parsuruonNa i, di angka ragam ni ulaonta.
Na paopathon, molo tung tahilala do na godang dosanta, unang ma mandele hita ala ni i, ndang gabe pangambati i di hita laho manjalo asi ni roha na sian Tuhan Jesus i. Alai, ingkon adong do di hita, pangarimangion na mamparbuehon panolsolion jala padan tu Debata asa marhamubaon ni roha. Laho mangurupi hita mangauhon pandohan on, taingot ma logu ni Buku Ende nomor 174 ayat 2 mandok "pardosa ho didok roham, na so tama be dohot, d.u." Marpardomuan tusi, taingot ma: marhite haheheon ni Jesus sian hamatean naung tapestahon di angka ari naung salpu (marhite pesta Paska), nunga be sae dosanta i. Ala ni i, ingkon adong do hamubaon ni roha di hita.
Na palimahon, taingot huhut tahangoluhon ma paboa: sai na marpamuati do Tuhan i di angka na manolsoli dosa nang hasalaanna. Amen. (ht)
Posting Komentar