EPISTEL MINGGU 21 MEI 2023
DITANGIHON DEBATA DO JOUJOU NI NAPOSONA
1 Petrus 5:6-10
Minggu Exaudi
TURPUK
Antong, patutoru hamu ma dirimuna tu toru ni tangan ni Debata na gogo i, asa dipatimbo hamu di tingkina i. Tingganghon hamu ma nasa na hinolsohon ni rohamuna tu Ibana, ai disarihon do hamu. Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna. Gomos ma hamu mangalo ibana marhitehite haporseaon; ingot hamu ma: Ndang tarbahen so songgop angka haporsuhon sisongon i nang tu angka hahaanggimuna na di portibi on. Alai anggo Debata nampuna saluhut asi ni roha naung manjou hamu tu hasangaponNa na manongtong i di bagasan Kristus, pauliulionNa, pahotonNa jala patoguonNa do hamu dung jolo ditaon hamu satongkin haporsuhon i.
PATUJOLO
Di bagasan parungkilon dohot pangaleleion na pinatupa ni halak Jahudi dohot halak Rom do halak na porsea uju i, tagan digurithon Apostel Petrus surat na on. Jala dipasahat Apostel Petrus do angka poda tu angka sintua asa denggan nasida marhobas. Boasa ingkon paingoton ni Apostel Petrus angka sintua i?
Na pinillit ni angka apostel dohot ruas do nasida asa gabe sintua (di hata Gorik didok presbuteros lapatanna seorang penatua; seorang pria dewasa yang memiliki kecakapan (berpengalaman)) laho marmahani ruas ni Debata, gabe sitiruon dohot patupahon pangurupion tu angka halak Kristen Jahudi na marhapogoson jala na anturaparon. Ala ingkon gabe sitiruon do nasida, umbahen i do asa dipaingot Apostel Petrus angka sintua i, lumobi ma di bagasan parungkilon do godang halak Kristen hatiha i.
HATORANGAN
1. Patutoru Diri (ayat 6).
Ginjang ni roha manghorhon hadadabu ni jolma tu dalan na ramun. Ala jorbut ni ginjang ni roha on do asa dipaingot Apostel Petrus angka sintua di hatiha i asa marserep ni roha. Ai gabe patupahon bada do ginjang ni roha, alai manghorhon dame do anggo serep ni roha. Ndang tama sada sintua manghobasi di bagasan ginjang ni roha alai ingkon di bagasan toruk ni roha do.
2. Tingganghon ma Nasa Holso (ayat 7).
Adong do di ayat pitu on didok hata "tingganghon," molo di hata Indonesia didok "serahkanlah," molo di hata Junani didok "epiripsantes," lapatanna "mandanggurhon," "pasahathon". Molo didok tingganghon marlapatan ma i songon ulaon na diulahon sahali ro di salelenglelengna, mandanggurhon manang pasahathon saluhutna ngolu on ro di sude angka holso ni roha tu Debata. Holso ni roha dohot habiaran di jolma olo do ro ala ni angka ragam ni sitaonon.
Alai nang pe dipasahat sude holso ni roha i tu Debata ndang gabe mambahen jolma na porsea i gabe ndang mulaulaon, alai ingkon di bagasan bisuk ni roha na sian Tuhan i do hita laho mangadopi sude angka na maol na adong di parngoluon on. Holso ni roha songon roha biar taringot tu aha na naeng masa tu joloan ni ari, nang pe ndang taboto dope toho do i masa manang ndang. Holso ni roha on hinorhon ni dosa do dohot pangalaosion ni jolma marhite hadadabu ni jolma i tu bagasan dosa. Pasahathon ngolu dohot holso ni roha tu Debata dipungka ma i marhite patutoru roha tu toru ni tangan ni Debata. Sian i ma boi idaon ni jolma na porsea pangaramotionNa di tongatonga ni parngoluon on. Pangaramotion ni Debata ndang holan taringot tu sipanganon, siinumon, pahean nang dohot parlinggoman, alai ihut do nang ngolu partondion ni na porsea i asa mangolu ibana.
3. Torang ma Roha jala Dungo (ayat 8).
Didok Apostel Petrus do asa "torang ma rohamuna" (di hata Indonesia didok "sadarlah"), molo di hata Junani didok "nepho" lapatanna "tarjolma" manang "malua sian hamabukon." Unang ma gabe mabuk jolma i dibahen angka ginjang ni roha dohot angka pangajarion na ramun sian angka panurirang pargapgap, ai i do na manghorhon asa gabe mura jolma i dielaela sibolis. Jolma na mabuk ndang ias be parnidaanna, songon jolma na mabuk nunga ramun jala maol be laho mangalapati pardalananna. Molo nunga ro si songon i, mura ma ibana diboan sibolis tu dalan na so ture. Haserepon ni roha do na manghorhon ias ni parnidaan laho marnida angka ulaula ni sibolis asa unang tarrobung angka jolma na porsea.
4. Gomos Mangalo Sibolis (ayat 9).
Dipaingot Apostel Petrus do taringot tu dalan laho manaluhon sibolis. Asa manghorhon hamonangon, ingkon garang jala aloon do sibolis. Ndang jadi lehonon tingki tu sibolis. Asa unang dielaela angka na porsea i tu dalan na so ture. Ingkon aloon do sibolis i di bagasan haporseaon na togu. Hata "togu" (teguh) dison molo di hata Junani didok "stereoi" lapatanna "hot," "togap," "gogo," jala "tang." Jadi ingkon margogo jala togap do angka na porsea i laho mangadopi angka parungkilon na masa. Hatiha i masa do pangaleleion tu halak Kristen na pinatupa ni halak Jahudi dohot bangso Rom. Alai disosoi do nasida asa unang manimbil, unang gabe manundalhon haporseaonna, ingkon togu do.
5. Patoguon ni Debata do Hita (ayat 10).
Gabe sada ayat manang hata silehon panghirimon na mangolu do ayat 10 on tu angka na porsea, atik pe di bagasan parungkilon. Dapotan hasangapon do angka na porsea, ndang ala ni ulaonna sandiri alai pambahenan ni Debata do na manjou angka jolma i tu hamoraon ni asi ni rohaNa. Ala Debata do na manjou, sian Debata ma nang angka pangurupion na pahothon haporseaon dohot panghirimon ni angka na porsea. Unang be nian munggil roha ni angka na porsea i dung dibege nasida ayat 10 on ai nunga tarjou nasida tu harajaon ni Debata.
HAHONAAN
Marhite hatorangan ni Epistel di Minggu 21 Mei 2023 na digoari Minggu Exaudi na marlapatan sai tangihon ma soarangku, ale Jahowa, molo joujou ahu; adong do pigapiga na dipasahat tu hita asa gabe tahangoluhon di ngolunta na marhaporseaon:
1. Marserep ni roha.
Marserep ni roha manang patutoru diri di adopan ni Debata manghorhon hasangapon na sian Tuhan i. Ingkon marserep ni roha do hita, tarlumobi ma di angka sintua dohot parhobas ni huria, naeng ma nian songon na nidok ni Jesus di Mateus 23 ayat 12 "ai sipaoruon do ganup na patimbo dirina, alai sipatimboon do na paoru dirina." Molo nunga marhobas hita di ladang ni Tuhan i, molo naung taula na denggan di bagasan ngolunta, unang ma dirimpu rohanta gabe sada si haginjanghononhon i, alai parohon hasangapon ma di goar ni Debata.
Godang do jolma na manghaginjanghon dirina ala dirimpu rohana nunga godang na niulana di tongatonga ni huria manang punguan jala manghilala ibana di toruna do jolma na asing, hape dos do sude jolma i di adopan ni Debata. Nionjar ni holong dohot haserepon ni roha ma nian ganup na porsea i mangulahon panghobasion dohot angka ulaon na denggan, asa manghorhon sangap di goar ni Jahowa.
2. Pahot haporseaon.
Godang do angka pargapgap jala parungkilon na masa, na mambahen sipata lomos haporseaonta di hasintongan ni hata ni Debata nang tu Tuhan i. Sian on do sibolis i mangelaela hita asa madabu tu dalan na so denggan. Ala ni i, di bahasan togu dohot tang ni haporseaon ma tabahen mangalo sibolis, angka pargapgap, manang uju na ro angka parungkilon ingkon do marhagogoon hita laho mangadopi i saluhutna.
Haporseaon na mangolu ndang na holan mandok porsea, alai ndang mulaulaon. Haporseaon na mangolu i ma haporseaon na manghorhon bisuk laho mangulahon na denggan di tongatonga ni parngoluon dalan laho marsiurupurupan. Molo nunga tang haporseaonta, tatogihon ma angka donganta na sai munggilunggil dope asa marhaporusan tu Jahowa nasida.
3. Panghirimon na mangolu.
Nunga dijou Tuhan Debata hita asa manghobasi di tongatonga ni HuriaNa, ala ni i molo pe ro angka sitaonon na dokdok ndada be mabiar hita disi, ai Ibana do na manjou hita jala laos Ibana do na margogoihon hita. Marhite turpuk ni Epistel on, tangkas do hita dipaingot paboa molo adong pe angka panghirimon, tapasahat ma tu Debata, ditangihon Debata do ganup angka na joujou di Ibana. Amen. (ms)
Posting Komentar