EPISTEL PENTAKOSTA 2 - 29 MEI 2023
HUASO NI TONDI NI DEBATA NA SO TARBATAS
2 Petrus 1:16-21
TURPUK
Ai ndada huihuthon hami angka turiturian na piningkir ni na bisuk di na hupabotohon hami tu hamu hagogoon dohot haroro ni Tuhanta Jesus Kristus; tung diida matanami do hatongamonNa i. Ai dijalo do hamuliaon dohot hasangapon sian Debata Ama, di na masa tu Ibana sian hasangapon na tongam i soara on: "On do AnakHu, haholongan ni rohangKu; na lomo do rohangKu di Ibana." I ma soara na hubege hami ro sian banua ginjang i, uju rap hami dohot Ibana di dolok na badia i. Jadi lam hot ma antong hata panurirangon i di hami; jala tama marsitiopan tusi ma hamu, songon na tu palito na marsinondang di inganan na holom, paima tarida siulubalang ari i, jala binsar siboan hatiuron di bagasan rohamuna. On ma parjolo boto hamu: Ndang dapot hatorangan ni nasa panurirangon na tarsurat anggo sian roha ni jolma. Ai ndang dung sian tahi ni jolma haroroan ni panurirangon; alai tinogihon ni Tondi Parbadia do, umbahen na marsoara angka jolma, disuru Debata.
PATUJOLO
Mansai maol do pasidingkon angka hasomalan na so marimpola manang parulaon ni hajolmaan na sai mangihuthon manang marguru tu lomo ni roha ni hajolmaon. Hombar tu turpuk ni Epistel di Parningotan di Hasasaor ni Tondi Parbadia na Paduahon, na dienet sian 2 Petrus 1:16-21 on, ditariashon do hasangapon ni Tuhan Jesus na pinuji jala na pinasangap ni Apostel Petrus. Panindangion dohot balga ni haporseaon na dipatolhas Apostel Petrus, i do nasa naung jinalona manang hagogoon ni Debata na marpanghorhon di bagasan ngoluna.
Hamuliaon dohot hasangapon ni Jesus na dipatuduhon marhite hasasaor ni Tondi na songgop di Tuhan Jesus na sian Debata Ama, i ma di na didok Ama i, "On do AnakHu, haholongan ni rohangKu; na lomo do rohangKu di Ibana." Sian pandohan na binege nasida i, gabe sitindangi ni Jesus ma nasida. Mambaritahon haluaon na binoan ni Debata marhite Jesus.
HATORANGAN
1. Hagogoon dohot Hatongamon ni Jesus (ayat 16).
Dirajumi Apostel Petrus do di bagasan ngoluna, gabe sitanda jala sitindangi ni Jesus naung manjalo ulaon marbaritahon barita na uli Ibana. Ndang magihuthon nasa angka turiturian na piningkiran ni na bisuk, alai mangihuthon sian hasintongan dohot hagogoon ni Tuhan Jesus Kristus do, na pasauthon jala pabotohon tu ibana. Ndada sian hata na dialap sian hajolmaon, alai sian na niida ni matana do hatongamonNa i.
Sitindangi hasintongan i ma angka na manghatindangkon sian na niidana, gabe porsea huhut mamaritahonsa, gabe torop ma na porsea. Parbue ni panindangion i ma sinuaeng, tung pe so diida mata, alai porsea sian Barita na Uli na pinasahat ni angka Apostel. Songon na nidok ni Jesus uju na rap dope dohot angka siseanNa dung hehe sian na mate: "Jadi didok ma tu ibana: Ala diida ho Ahu, umbahen na gabe porsea ho. Martua ma angka na porsea, atik pe so diida" (Johannes 20:29).
2. Hamuliaon dohot Hasangapon ni Jesus (ayat 17-18).
Hasasaor ni Tondi Parbadia na manggohi Jesus marhite na ro soara sian banua ginjang na mandok: "On do AnakHu, haholongan ni rohangKu; na lomo do rohangKu di Ibana." Gabe digoki hamuliaon dohot hasangapon ma Jesus, jala patar do i diida angka SiseanNa uju rap nasida dohot Jesus di dolok na badia. Laos diida Sisean i ma muse na manghatai Jesus rap si Elia dohot si Musa.
Panindangion dohot pangungkapon sian Debata do harorona. Gabe hasintongan do i di nasa panurirangon ni angka Panurirang dohot Sisean ni Jesus. Ala ni i do asa dijalo Apostel Petrus dohot angka sisean i panghobasion hombar tu angka na niida dohot na binegenasida. Diondolhon pandohan i do, paboa marhite hamuliaon dohot hasangapon ni Jesus do asa jaloonta haluaon, sahat ro di haroroNa sogot. I ma na gabe panghirimon na mangolu di hita, na mangalehon hangoluan si saleleng ni lelengna.
3. Hot do Hata ni Debata Marsinondang jala Siboan Hatiuron (ayat 19).
Panindangion dohot pangungkapon i ndada holan mangihut sian na masa uju Apostel Petrus mamaritahonsa, alai sian Padan na Robi pe nunga dipatolhas. On ma na pataridahon, na hot ma do Hata ni Debata sian Padan na Robi, Padan na Imbaru sahat di tingki si nuaeng pe, ro di na masa sogot sahat ro di saleleng ni lelengna. Laos Hata ni Debata i do na patuduhon dalan tu hangoluan dohot hasintongan na marsinondang jala siboan hatiuron di ngolunta nang di portibi on.
Dipatolhas di ayat 19 mandok, "Jadi lam hot ma antong hata panurirangon i di hami: Jala tama marsitiopan tusi ma hamu, songon na tu palito ... ." Ndang mardia imbar hape jala hot do panindangion ni Hata ni Debata, dibahen i asa unang dililuhon nasa angka pandohan manang pangantusion na sian portibi on hita na sai olo mambahen ganggu ni roha. Marhaposan situtu ma hita di Hata ni Debata.
4. Tinogihon ni Tondi Parbadia Marbarita Sian Parsuru ni Debata (ayat 20-21).
Mansai togu do dipasahat di ayat 20-21 on, na mandok: "On ma parjolo boto hamu: Ndang dapot hatorangan ni nasa panurirangon na tarsurat, anggo sian roha ni jolma." Lapatanna holan marhite hahomion jala hagogoon ni Debata Jahowa do umbahen manjadi jala sahat hata panurirangon i, ndada marguru tu roha ni jolma. Songon i do nang na masa di angka na sinurirangkon ni angka panurirang i pe, sian huaso jala gogo na sian Debata i do umbahen na masa songon na hinatindangkon nasida i.
Songon i do nang pandohan " ... alai tinogihon ni Tondi Parbadia do umbahen na marsoara angka jolma disuru Debata." Hata on patorangkon paboa Tondi Parbadia do na patolhashon asa marhagogoon jolma i, huhut tarbahensa marpandohan di bagasan goar ni Debata. Naso tarbahen ni jolma sai na manjadi do nasa angka na tinogihon ni Tondi Parbadia. Laos ajaran ni Tondi i do tongtong hita mananda nasa na hinalomohon ni Debata di ngolunta.
HAHONAAN
Na parjolo, manongtong ma hita angka naung ginohan ni Tondi i, mangihuthon parsuru ni Debata laho mangulaon nasa na hinalomohon ni Debata. Sai na rap dohot Tondi i do hita laho mamaritahon hagogoon dohot huaso ni Debata di ngolunta. Unang ma hita marpangunsandean tu gogo dohot pingkiranta. Alai saluhutna ma tapasahat tu Debata na mangalehon di hita nasa ragam ni ulaon ni Tondi di ngolunta.
Na paduahon, taharinggashon ma tumangihon jala manghangoluhon huhut mangulahon Hata ni Debata. Songon hata ni Debata na mandok: "Alai ninna Ibana ma: Martua ma angka na umbege Hata ni Debata jala na umpeopsa!" (Lukas 11:28). Songon i ma nian tongtong hita mangulahon Hata ni Debata. Laos pabotohon jala togihonon ni Tondi i do hita marpangalahohon jala mangulahon Hata ni Debata. Gabe marimpola ma nasa na tinogihon ni Tondi i molo marpangunsandean tu Hata ni Debata. Songon i ma tongtong di parngoluonta on asa gabe pasupasu ma nasa na mangulahon lomo ni roha ni Debata, sian nasa parbaritaan na uli.
Na patoluhon, huaso ni Tondi na so tarbatas do naung tajalo di bagasan ngolunta, marhite i ma, nasa na tinogihon ni Tondi i marpanghorhon do i di ngolunta siganup ari. Gabe hot ma hita di haporseaon jala gabe parsidohot manghatindangkon hasangapon dohot hamuliaon ni Jesus. Margogo ma hita mangasahon hatiuron na sian Hata ni Debata. Amen. (rrs)
Posting Komentar