JAMITA MINGGU 14 MEI 2023
UNANG HOLSOAN HAMU AGIA AHA
Pilippi 4:1-7
Minggu Rogate
TURPUK
On pe, hamu angka donganhu na hinaholongan jala na hinasiholan, halasan ni rohangku jala tumpalhu; songon i ma marsihohot hamu di bagasan Tuhan i; hamu angka haholongan. Hamu Euodia dohot Sintike, huapoi ma hamu asa marsada ni roha di bagasan Tuhan i. Huelekelek ma dohot ho ale Sinsigus na bontor, urupi ma nasida angka naung mandongani ahu marungkil humophop Barita na Uli, raphon si Klemens dohot donganhu saulaon na deba nari; di buku hangoluan i do goarnasida. Marlas ni roha ma hamu tongtong di bagasan Tuhan i! Huulahi ma mandok: Marlas ni roha ma hamu! Pabotohon hamu ma habasaronmuna tu saluhut halak! Donok do Tuhan i. Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elekelek mardongan mauliate. Jala dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus.
PATUJOLO
Dung dipiliit Debata si Paulus gabe parbarita na uli tung marragam do angka parungkilan na niadopanna. Godang angka parsorion na ro ibana, isarana pola sampe tarhurung ibana, dilele, dohot angka na asing ditaon ibana holan laho patulushon ulaon marbarita na uli di angka luat. Tung marparbue do ulaonna i, lam rarat do angka na porsea di angka panghobasion naung pinatupana, jala tung tangkas do i tahilala sahat tu partingkian si nuaeng on.
Alai di angka parbue ni ulaon panghobasionna i, sipata masa do angka parsalisian di tongatonga ni ruas ni huria i. Jala molo masa na si songon i, tontu marungkil do si Paulus mamingkirhon i. Tarida do i marhite turpuk on, di na masa parsalisian di sahalak na margoar Euodia dohot Sintike, ro do pangapoion ni Apostel Paulus maradophon nasida. I do na pinasahat ni turpuk ojahan ni jamita di Minggu Rogate di bagasan tingki on.
Songon ruas ni huriaNa hita, aha ma na boi patipaonta tu angka donganta? Aha do na gabe tanda di hita paboa na manghaporseai Kristus hita? Di partingkian si nuaeng on, molo masa angka parsalisian di donganta, aha do na boi patupaonta? Pinomat angka i ma na boi tapahusorhusor di bagasan rohanta, tamba ni angka panghonai ni turpuk on naung adong di pingkiranta be, laos ingkon i do na gabe mutiha di haporseaonta.
HATORANGAN
1. Pangapoion sian Apostel Paulus (ayat 1-3).
Tung holong do roha ni Apostel Paulus tu huria na adong di Pilippi. Diondihon apostel i do huria Pilippi di tangiangna. Diparhatopot apostel i do paboa angka naung pinarbadiaan ni Debata do saluhut halak na adong di huria i jala naung saor do huria i tu Barita na uli (ida Pilippi 1:1-5). Ia si Euodia dohot si Sintike i ma dua halak parompuan, jala ruas ni huria Pilippi do nasida, naung tarsurat goarnasida di buku hangoluan i (ayat 3). Parsidohot do nasida na dua mandongani Apostel Paulus marungkil humophop Barita na Uli i.
Alai masa ma parsalisian di nasida na dua, hape nunga dijalonasida Barita na Uli. Ndang apala tangkas di turpuk on aha do na gabe sibonsiri ni parsalisian nasida. Hinorhon ni na masa i ma umbahen na diapoi Apostel Paulus nasida asa marsada ni roha di bagasan Tuhan i. Jala dipangapoionna i, dielek apostel i do si Sinsigus, sahalak na bontor (teman yang setia) rap dohot si Klemens dongan ni apostel i, songon i nang angka dongan saulaon ni apostel i na deba nari asa mangurupi nasida nadua.
Disosoi apostel i do angka donganna asa mangurupi si Euodia dohot si Sintike. Tontu parsuruon ni apostel i di na dipangido ibana asa diurupi nasida, asa mardame do nasida nadua, asa unang marsalisi, asa unang tu bagasna parsalisian ni nasida nadua. Anggiat boi rap sauduran muse ruas ni huria i, lumobi ma di nasida nadua. I ma na gabe sintuhu ni hataridaan ni na marsada ni roha di bagasan Tuhan i.
I do tutu, tung arga do hasadaan ni roha di bagasan huria i. Taboto do, sasintongna tung na maol do patupahon hasadaon ni roha di angka parpunguan, songon i do sasintongna nang di bagasan huria. Na mambahen i asa maol ala tutu ndang sarupa sude parrohaon ni jolma i; asing halak, asing muse do nang roha nang parangena. Ala ni angka roha nang pingkiran na marasing i do na olo mambahen tubu angka parsilisian, lumobi ma di tonga ni huria i.
Alai atik pe masa parsalisian i, ndada gabe laos dipaso apostel i laho patupahon dalan paturehon parsalisian i, i ma marhite na dielekelek apostel i si Sinsigus, si Klemens dohot angka dongan ni apostel i na deba nari. Di na masa i, pihak ketiga manang orang ketiga do nasida. Di pamingkirion ni jolma si nuaeng on, molo didok taringot tu orang ketiga adong do pangalapation na so denggan taringot tu pandohan i. Alai di pamingkirion ni jolma do i, ndada songon i molo di adopan ni Debata.
Marhite turpuk ni Jamita on disosoi do hita, asa molo adong na marsalisi, ringkot do adong pihak ketiga manang orang ketiga na disosoi Debata, na ingkon boi pademakhon jala padamehon angka parsalisian. Ai molo Debata do na manosoi, tontu didongani Tondi na sian Debata i do hita mangula na denggan. Songon i do na masa di si Klemens dohot na asing na i. Boi do auhononta i di dirinta, atik pe gabe pihak ketiga manang orang ketiga nasida, alai na pinaborhat ni Debata do nasida marhite sososo ni Apostel Paulus, asa unang be marsalisi si Euodia dohot si Sintike di bagasan huria i.
2. Marlas ni roha di bagasan Tuhan i (ayat 4-5).
Dung disosoi Apostel i si Sinsigus dohot na asing na i asa mangurupi paturehon parsalisian ni si Euodia dohot si Sintike, diuduti do mandok asa marlas ni roha nasida di bagasan Tuhan i. Tung togu do dipasahat apostel i do pandohanna i, pola sampe didok: "Huulahi ma mandok: Marlas ni roha ma hamu." I do tutu, marlas ni roha do jambar ni halak na porsea. Marlas ni roha na nidokna dison, ndada na mandok na so adong parsorion molo porsea tu Kristus, alai na mandok: atik pe masa parsorion i, urupanNa do hita, laos marhite pangurupionNa do mambahen las rohanta jala las ni roha i tontu di bagasan Tuhan i do.
Sude do halak mangharingkothon asa marlas ni roha, alai aha do na gabe hataridaanna? Ragam pamingkirionta molo taringot tu na marlas ni roha. Alai marhite turpuk on ingkon marlas ni roha do hita di bagasan Tuhan i, ndada sian na marhite na adong di pingkiranta. Molo tolap do hita manghangoluhon asa marlas ni roha di bagasan Tuhan i laos marhite i do boi hita pabotohon habasaron na sian Tuhan i. Jala di bagasan las ni roha i do dalanta laho pabotohon na donok do Tuhan i.
Ala ni i, molo tahangoluhon do na marlas ni roha hita di bagasan Tuhan i, hombar tu turpuk ni Jamita on, ingkon saurdot do i dohot parsuruon. Lapatanna ingkon mangolu (aktif) do ndang mate (pasif). I do umbahen na didok apostel i asa "pabotohon hamu ma." Unang ma holan na so hita, unang ma sai sip tu angka na humaliangta di na laho pabotohon huaso ni Debata. Holan halak na manghangoluhon paboa na donok do Debata na tolap marlas ni roha di bagasan Tuhan i, ndang marlas ni roha di bagasan ni na asing.
3. Unang holsohon hamu agia aha, pasahat ma tu Debata marhite tangiang (ayat 6-7).
Tutu, sai olo do ro holso (kekhawatiran) di ngolu ni jolma, jala hinaholso i dihabiari jolma do. Nda tung adong jolma na lomo rohana sai holsoan. Disosoi Apostel Paulus do asa nasa hinaholso i dipasahat ma tu Debata marhite tangiang dohot elekelek mardongan mauliate. Boi do tarimangi jala tahangoluhon, molo ro holso i, manigor martangiang ma hita, mangelek tu Tuhan i, asa boi hilalaonta dame di panghilalaanta jala lumumbang nang pangikiranta. Molo songon i do panghilalaanta uju martangiang hita, disi ma masa na nidok ni Apostel Paulus di turpuk on, i ma: "Ramotan ni Debata do ateate dohot pingkiranta di bagasan Kritus Jesus i." Marhitehon i lam tu pos na ma rohanta, sai lehonon ni Debata do dalan di angka na taholsohon. Ala ni i unang ma olo hita dirajai angka holso.
HAHONAAN
Marhite turpuk ni Jamita di Minggu sadari on di Minggu Rogate, na marlapatan ale Jahowa, sai tangihon ma tangianghi, patinggil pinggolMu umbege anggukhon, aha ma na boi sipeoponta na laho gabe bohal di tongatonga ni ngolunta? Marhite turpuk ni Jamita on, tapeop ma:
Na parjolo, molo masa parsalisian di tongatonga ni huria manang di humaliangta, ingkon do gabe pihak ketiga manang orang ketiga hita na pinaborhat ni Debata, asa paturehon parsilisian i, pinomat unang lam patamba bagas parsalisian i. Hajongjonganta di na gabe pihak ketiga manang orang ketiga na nidokna dison, i ma songon si Sinsigus, Klemens dohot angka na deba nari. Tasungkun ma dirinta, molo orang ketiga do hita di na masa parsilisian, na pinaborhat ni Debata do hita manang na pinaborhat ni sibolis? Molo gabe dame do donganta na marsalisi i, manang gabe marsada, tarida ma na pinaborhat ni Tuhan i do hita. Alai molo lam bagas do parsalisian i ala ni hita, ise do na paborhathon hita? Lumobi ma di hamajuon ni jaman on, mura do mambahen jolma marsalisi. Alai marhite turpuk on, dipangidohon Debata do tu hita asa gabe songon si Klemens, Sinsigus dohot angka na asing na i, na mangurupi patupahon na denggan.
Na paduahon, di bagasan Tuhan i ma talului jala tahangoluhon las ni rohanta. Tahangoluhon ma hasisingkop ni las ni rohanta di bagasan Tuhan i, i ma: Di naung hehe Tuhan Jesus sian hamatean i (taingot ma pesta Paska naung tapestahon i di minggu naung salpu). Ndang adong las ni roha na ummarga asing ni las ni roha naung pinasahat ni Debata, marhite naung hehe AnakNa i sian hamatean.
Na patoluhon, goar ni Minggunta sadari on i ma, Minggu Rogate, lapatanna martangiang. Adong do pigapiga ende di Buku Endenta i na marpardomuan tu tangiang, i ma: Buku Ende nomor 279 "Pasahat ma Sudena" dohot Buku Ende nomor 487 "Tung Halak na Margogo." Marpardomuan tu turpuk ojahan ni Jamitanta di Minggu on, dua ende i boi do patoguhon hita asa lam mangolu di bagasan tangiang. Ala ni i tapasahat ma angka na taholsohon tu Ibana marhite tangiang, ai guru di Ibana do luhutna. Dokdok pe angka sitaonon na taadopi alai molo sipartangiang do hita ndang gabe talu hita di sitaononta i. Amen. (ht)
Posting Komentar