JAMITA MINGGU 21 MEI 2023
DITANGIHON DEBATA DO JOUJOU NI NAPOSONA
2 Samuel 22:1-7
TURPUK
Dung i dihatahon si David ma tu Jahowa angka hata ni ende on, di ari dung na pinalua ni Jahowa ibana sian tangan ni saluhut musuna dohot sian tangan ni si Saul. Ninna ma: "Jahowa do dolok batu di ahu dohot haporusanhu, jala sipalua ahu. Debata do partanobatoanhu, marhaposan tu ibana do ahu, lombulombungku dohot tanduk ni partuaonhu, parondingondinganhu dohot haporusanhu, sipartumpak di ahu, Ibana palua ahu sian uhum gogo. Sai hupajoujou do Jahowa na tama sipujion i, jadi malua ma ahu sian angka musungku. Nunga pola dihaliangi angka ombak ni hamatean ahu, angka sunge ni hajahaton manonggoti ahu. Nunga pola dihaliangi angka rante ni banua toru ahu, dilingkupi angka jorgong ni hamatean i ahu. Jadi di na targogot i ahu, hujou do Jahowa, jala hupangiar anggukhu tu Debatangku, jadi ditangihon Ibana soarangki sian joroNa, jala tolhas anggukhi tu pinggolNa.
PATUJOLO
Molo disungkun tu hita, ise do Debata di bagasan ngolunta? Tontu olo do marragam angka alus ni jolma taringot tu sungkunsungkun on. Molo naung tatanda Debata, marhite aha do patuduhononta partinandaanta i. Molo holan mananda alai ndang mangulahon manang aha, porlu do sungkunon, toho do partinandaan i? Boi do hita marsiajar sian raja David na manurathon ise do Debata di turpuk on jala aha do na niula ni Debata di bagasan parngoluanna. Boi do hita mambuat parsiajaran sian turpuk on, laho patuduhon partinandaanta di Debata.
HATORANGAN
1. Na parjolo, patoranganhon taringot tu ise do Debata di bagasan ngolu ni raja David. Na masa di ngolu ni raja David di turpuk on mamboan ibana tu panandaionna di Debata. Molo di panuturion ni raja David, Debata i ma dolok batu, sipalua, partanobatoan, lombulombu, tanduk ni partuaon, parondingondingan, haporusan jala sipartumbak (ayat 2-3). Ndang na holan ala manjaha pustaha na badia raja David umbahen na adong partinandaan na di Debata. Ndang na holan ala na dibege ibana Jamita taringot tu huaso ni Debata. Alai tangkas do dihilala ibana huaso ni Debata di ngoluna umbahen na dirajumi ibana holong ni roha ni Debata, gabe i ma na manghorhon partinandaanna di Debata. Tangkas do dihilala ibana, holan di bagasan Debata do jumpangna si songon i.
2. Na paduahon, taringot tu na niula ni Debata di tongatonga ni ngolu ni raja David, i ma na gabe tanda tu panandaion na di Debata. Dipatorang do di ayat 4-7, tagan digora raja David goar ni Debata dipalua do ibana sian musuna. Dihaliangi ombak ni hamatean do ibana, sunge ni hajahaton, rante ni banua toru jala jorgong ni hamatean. Na masa di parngoluan ni raja David, gabe dalan ni Debata do laho pautuduhon huasoNa. Ala ni i do umbahen na didok ibana di ayat 7, tagan targogot ibana ditangihon Debata do joujouna.
3. Na patoluhon, dibahen raja David do songon sada dalan asa mananda hita di Debata. Marhite turpuk on, didok do di ayat 4 dohot ayat 7, dijou raja David do Debata. Parungkilon na masa i ndang gabe mambahen raja David gabe laos maninggalhon Debata, alai gabe dalan do i di ibana asa patang haporseaonna di Debata. Sian on ma tabereng, ndang marpangusandean raja David di hasangapon ni hajolmaon, nang pe sahalak raja ibana, alai marhaposan tu Jahowa do ibana.
Aha do huroha na masa di ngolu ni raja David umbahen na pola sai joujou ibana di goar ni Debata? Jala pola gabe didok ibana dihaliangi ombak ni hamatean ibana? (ayat 5-6). Molo taparrohahon di bindu 21, boi do tabereng na masa do haleon potir tolu taon lelengna (21:1), masa nang parporangan halak Pilistim dompak halak Israel (21:15), jala talu do dibahen nasida si Goliat, jala angka halak na ganjang, onom be jarijari ni tangan dohot patna (21:19-20), jala sian tangan ni si Saul (ida 1 Samuel 24:17-19).
Alai boi do diadopi raja David angka na masa i. Sude na i ala ni pangurupuion ni Debata do na masa di tongatonga ni raja David. Ndang dipasombu Debata nasida dipalealea bangso na asing. Ala gomos do ditiop nasida haporseaonna tu Debata, gabe manghorhon hamonangon do i di nasida. Ala ni sude angka ma masa i jala sai di bagas pangaramotion ni Debata do nasida, dipuji jala diendehon raja David ma angka pujipujian na tau pasangap goar ni Tuhan i.
HAHONAAN
1. Debata di Ngolunta.
Ingkon adong do partinandaan na tamgkas di hita, ise do Debata di ngolunta. Partinandaanta i unang ma nian tadapot holan sian na mambege Jamita manang parsiajaran ni haporseaon. Alai di bagasan ngolunta si ganup ari on ingkon mardalan jala mampangasahon Tuhan i do di na laho mangadopi sude gulmit ni ngolu on. Sian i, boi ma idaonta ise do Debata di ngolunta, tahilala jala tajamitahon ma holong ni Tuhan i. Gabe Jamita na mangolu ma i di bagasan ngolunta.
Godang do angka na ringkot sipaulionta di tongatonga ni ngoluanta on jala godang do na maol, lumobi ma molo mambaritahon na sintong hita, sai adong do angka na manjungkati hita. Ala ni i ma, marhite pangarajumion ni raja David disosoi do hita asa marpangusandean hita di huaso ni Debata. Ingkon tarimangi do, angka aha ma naung diulahon Debata di ngolunta on nang pe maol angka sitaonon. Molo dapotan parungkilon hita, tajou ma goar ni Debata, marpangusandeaon tu Ibana ma hita asa dapotan hangoluan hita.
2. Siulahononta Patuduhon Panandaionta di Debata.
Ala dirajumi raja David do habalgaon ni Debata jala ditanda ibana do Debata marhite angka na masa di ngoluna. Dipatudu ibana do partinandaanna i marhite ende pujipujian laho pasangaphon Tuhan i. Nang di hita pe angka na porsea, ingkon patuduhononta do partinandaanta i di adopan ni Debata marhite angka ende, pujipujian, panghobasion, tangiang dohot angka lan na asing.
Adong do jolma na patuduhon partinandaanna marhite ulaon panghobasion tu angka na pogos. Adong do na patuduhon partinandaanna marhite parkarejoanna. Adong muse do na patuduhon partinandaanna marhite angka ende dohot pujipujian, marhite na patupa angka na denggan di partungkangan, lompalompa, pahean na uli, suansuanan, ulaon na denggan di angka na manggomgomi nang angka lan na asing. Sandok angka aha ma na tau ulahononta sadari on laho pasangaphon goar ni Tuhan i, ingkon patupaonta do.
Sitongka do molo gabe tatundali angka aha naung niula ni Debata di tongatonga ni ngolunta. Ingkon ingot do hita disi, ai nunga godang na niula ni Debata di ngolunta on. Tapatuduhon ma partinandaanta di Tuhan i, tatogutogu jala tatogihon ma angka donganta na so mananda Debata dope jala na so olo dope laho patuduhon haporseaonna manang partinandaanna di Debata. Asa rap marlas ni roha hita laho mamujimuji holong ni rohaNa di hita. Parsidohot ma hita laho mangurupi jala manghobasi di ladang ni Tuhan i. Amen. (ms)
Posting Komentar