JAMITA MINGGU PENTAKOSTA 1 - 28 MEI 2023
JALO HAMU MA TONDI PARBADIA
Johannes 20:19-23
Pentakosta 1
TURPUK
Jadi dung bot ari, di ari parjolo dung salpu ari Sabbat, di naung sordak angka pintu ni inganan ni angka sisean i, ala ni biar ni rohanasida mida angka Jahudi, ro ma Jesus jongjong tu tongatonganasida, jadi didok ma tu nasida: "Dame ma di hamu!" Jadi dung didok songon i, dipatuduhon ma tanganNa dohot andoraNa tu nasida, gabe las ma roha ni angka sisean i, ala naung diida nasida Tuhan i. Dung i diulahi Jesus ma mandok tu nasida: "Dame ma di hamu! Songon sinuru ni Ama i Ahu, suruonHu hamu." Jadi dung didok songon i, mangombus ma Ibana dompak nasida, huhut ma didok: "Jalo hamu ma Tondi Parbadia! Molo disesa hamu dosa ni manang ise, naung sesa ma i; molo dipahot hamu dosa ni manang ise, hot do i."
PATUJOLO
Molo adong na masa di sada inganan, isarana songon na maralo di uhum jala ringkot do asa dipature, tontu ingkon adong do na gabe sitindangi manang angka panguhum na laho papatarhon manang paturehon angka na masa i, jala angka ise ma na gabe parsidohot disi. Dipatorang ma songon dia do asa boi masa i jala songon dia ma i masa sian na parjolo sahat tu na sidung, asa boi dihaporseai halak. Alai na masa uju na mate Jesus sahat tu na hehe Ibana, ndang na pola songon hamajuon nuaeng di na boi mambahen angka foto nang video marhite alat perekam/recorder manang kamera.
Di hita nuaeng maol do tarjalo roha ni jolma taringot tu na tutu na masa manang ndang, molo so adong dibege rekaman ni soara jala diida fotona. Dison ma dipatangkas tu ganup na porsea, adong do pigapiga tanda na pataridahon, paboa na tutu do na masa i, na boi patoranghon angka na masa i di panghobasionNa di portibi on. Tapamanat ma hatorangan ni Jamita di Minggu Parningotan di Hasasaor ni Tondi Parbadia (Pentakosta) na Parjolo on na dienet sian Evangelium Johannes 20:19-23, dohot ojahan ni Jamita "Jalo Hamu ma Tondi Parbadia."
HATORANGAN
Dung marujung haberniton na tinaon ni Jesus di hau pinarsilang, tahutan situtu do angka sisean dohot parompuan na satia mangihuthon Ibana. Boasa tahutan? Ala uju di ari Sabbat—dung tolu ari sian hamamateNa—ndang di tanoman i be Jesus jala nunga be magulang batu na manutupi baba ni tanoman i (ida Markus 16:3-5). Gabe longang do angka sisean i jala tahutan, sampe disordak nasida pintu ni inganan nasida (ida Johannes 20:19). Marsugut nasida sotung diida halak Jahudi, sotung gabe mangalualu nasida tu sordadu ni halak Rom gabe diuhum angka sisean i. Alai dison ma dipapatar laos dipataridahon sangkap ni Jesus umbahen na pola ro tu portibi on.
1. Dame ma di Hamu (ayat 19-20).
Di bagasan roha biar do nasida uju ndang rap be dohot Jesus. Jadi dung bot ari, di ari parjolo dung salpu ari Sabbat—di naung sordak angka pintu ni inganan ni angka sisean i, ala ni biar ni rohanasida mida angka halak Jahudi—ro ma Jesus jongjong tu tongatonganasida, jadi didok ma tu nasida: Dame ma di hamu! Disurathon Evangelium Johannes do na mabiar nasida tu halak Jahudi. Tarjalo roha do i, ai saleleng on rap do nasida dohot Jesus. Tu dia pe Jesus bongot, ro do nasida mangihuthon langka ni Jesus. Alai dung jumpang tingkina, ingkon laho Ibana tumopot AmaNa, umbahen i do asa ditadingkon Ibana angka siseanNa i nang sude angka na mangihuthon Ibana.
Alai digohi Jesus do padanNa manang angka naung hinatahonNa. Molo tabereng di bindu 14 ayat 18 didok, "Ndang tadinghononHu hamu so marama, na ro ma Ahu mandapothon hamu." Ro do Ibana di borngin i marnida angka siseanNa i jala laos didok ma tu nasida, "Dame ma di hamu!" Tarsonggot situtu do nasida. Ala disordak nasida do bagas i, jala ndang adong na mamboto inganan i, hape boi tolhas Jesus tumopot nasida. Mabiar situtu do nasida jala taroktokon mangida Jesus.
Ala di bagasan hatahutan do angka sisean i, pola sampe ro Jesus laho patuduhon na tutu do Ibana naung hehe (manaluhon hamatean). Sada hasintongan na mansai arga do on, na gabe sada tanda paboa na sintong do barita haheheonNa. Nian tarjalo roha do hatahutan nasida i, tarsordak do pintunasida, sai hira na dilelei angka musu do, na laho mambuat ngolunasida. Ala ni i, uju na ro Jesus di inganan i, pintor didok Jesus tu nasida, "Dame ma di hamu!" Hata on patorangkon asa unang be ganggu, tahutan, manang angka hitir roha ni angka sisean i. Sai hira na mago do pusupusu nasida marnida na masa i jala boi do tong dohonon tarmali tondi. Dung didok Jesus tu nasida, "Dame ma di hamu!" laos mulak sonang ma rohanasida. Alai ndang sae holan mandok hata i, laos dipatuduhon do nang tanganNa nang andoraNa tu nasida, gabe lam las ma rohanasida muse.
2. Songon Sinuru ni Ama i Ahu, SuruonHu ma Hamu (ayat 21).
Buku ni Evangelium Johannes on jotjot do manurathon angka pangajarion na boi dilapati songon angka na ro sian ginjang. Sian ginjang do haroro ni Jesus, na sinuru ni Ama i, ala holong ni rohaNa do (ida Johannes 3:16). Di partingkian na parpudi Jesus rap dohot angka siseanNa dihatahon Jesus do tu nasida, asa adong hatorusan ni parsuruon i. Na sinuru ni Ama i do Ibana, gabe suruon ni Jesus ma nang angka siseanNa. Balga situtu do sangkap ni Jesus na naeng torushonon ni angka sisean i di portibi on, suang songon i do nang asa ditorushon tu hita huriaNa, asa lam mangerbang Harajaon ni Debata di sandok portibi on.
3. Jalo Hamu ma Tondi Parbadia (ayat 22-23).
Molo taida marasing do pandohan ni Jesus na sinurat ni si Johannes on, molo tapatudos tu hasasaor ni Tondi di angka sisean i. Dipabotohon si Johannes do, ndang na gabe maralo tu ari palimapuluhon dung hamamate ni Jesus (Pentakosta), alai na naeng patoranghon do, paboa Tondi na sian Jesus, i ma Tondi Parbadia. Lapatanna, Tondi na dilehon i, TondiNa do i. Ndang na disi ondolan ni hata ni Jesus i. Jadi aha do? Asa pahothon roha ni angka sisean i do umbahen na didok Jesus songon i, asa unang be tahutan nasida, jala asa barani nasida mamaritahon/paboahon naung hehe Jesus na niida nasida mansai tangkas, tu torop halak. Barita na uli dison na jumolo i ma, asa tarbarita taringot tu haheheonNa, asa gabe sitindangi ma nasida disi.
Baca juga!
HAHONAAN
Damang/dainang na hinaholongan di bagasan goar ni Tuhanta. Sadari on marningot do hita do ari hasasaor ni Tondi Parbadia di angka sisean i. Jala diondolhon do tu hita ondolan ni Jamita na mandok, "Jalo Hamu ma Tondi Parbadia." Aha ma na boi gabe sipeoponta marhite turpuk ni Jamita on? Dipaingot do hita amang/inang, asa:
1. Taingot ma, hasasaor ni Tondi Parbadia i sada basabasa do i tu ganup jolma angka na tinobusNa, asa barani, dipargogoi jala girgir di haporseaon.
2. Di partingkian si saonari on, ingkon do tarajumi, angka na manjalo Tondi Parbadia (halak na porsea), ndang adong be sidalian na mandok, "Pasombu ma disi, lok ma angka na manjalo tohonan i na marbarita na uli." Alai ingkon hehe do nang hita, ingkon parsidohot do hita pabotohon, paboa tutu do naung hehe Jesus sian na mate jala pamonangkon hita sian nasa dosa.
3. Tondi Parbadia do na patuduhon dalan na tiur jala na tigor asa unang tarunjun angka jolma i. Ala ni i tapangasahon ma Tondi i di nasa parngoluonta, ai Tondi i do na mandongani nang na margogoihon hita. Tondi Parbadia do na tongtong mandongani nasa huriaNa, ala ni i do asa jongjong dope nang HuriaNa sahat tu partingkian si nuaeng on. Amen. (is)
Posting Komentar