JAMITA PENTAKOSTA 2 - 29 MEI 2023
HUASO NI TONDI NI DEBATA NA SO TARBATAS
4 Musa 11:24-30
TURPUK
Dung i ruar ma si Musa, laos dipatolhas ma tu bangso i angka hata ni Jahowa, jala dipapungu pitupulu halak sian angka sintua ni bangso i jala dipajongjong nasida humaliang undungundung i. Dung i tuat ma Jahowa di bagasan ombun i laos manghatai dohot ibana, jala dibuat sian tondi na songgop tu ibana, jala dilehon tu na pitupulu halak sintua i; jadi dung mangulon tondi i di atasnasida manurirangi ma nasida, alai dungkon ni i, ndang be dididatdati. Alai tinggal dope dua halak di parsaroan, goar ni na sada si Eldad, jala goar ni na sadanari si Medad, mangulon huhut tondi i di atasnasida, ai dohot do nasida masuk tu angka na tarsurat i, alai dung ruar nasida tu undungundung i, gabe manurirangi nasida di bagasan parsaroan i. Dung i marlojong ma sada dolidoli paboahon barita i tu si Musa: Si Eldad dohot si Medad manurirangi di bagasan parsaroan. Dung i ro ma alus ni si Josua, anak ni si Nun, parhalado ni si Musa olat ni haposoonna, ninna ma: "Ale tuanhu Musa, orai ma nasida!" Alai ninna si Musa ma mandok ibana: "Tung tama ma ho mangiburu mandingkani ahu? Anggiat nian dipangido rohangku sandok bangso ni Jahowa manurirangi, jala dibasabasahon Jahowa tondiNa songgop tu atasnasida." Dung i marpungu ma muse si Musa tu parsaroan i, ibana tahe rap dohot angka sintua ni Israel.
PATUJOLO
Halongangan situtu do Hasasaor ni Tondi Parbadia na masa di angka sisean ni Jesus. Hasosonggop ni Tondi i tu angka sisean, ndada holan marhite na marasing be angka hata (bahasa) nasida. Nang pe marasing angka hata ni angka sisean i, marsiantusan do nasida. Marhite hasasaor ni Tondi i, ndang be mabiar manang tahutan angka sisean i. Alai dipatuduhon nasida do na saor Tondi ni Debata di marhite na mamboan manang pasar Barita na Uli. Jala marparbue do naniula ni nasida i, gabe torop ma na porsea mangihuthon Jesus.
Hasasaor ni tondi ndang be na imbaru, na so hea masa. Alai nunga be hea masa uju i di Padan na Robi. I ma uju dipasahat Debata tu si Musa ulaon asa manguluhon bangso Israel tu tano naung diuarihon ni Debata. Sahalaksa do na manguluhon bangso i. Mansai godang do jumpangsa angka parungutunguton ni bangso i, dung ruar nasida sian Tano Misir, jala mangadopi pardalanan na mansai dao. Songon na dokdok do dihilala bangso i jala sai marmungutmungut do nasida. Songon na so tolap be gogo ni si Musa mangadopi bangso i, umbahen na pola sampe didok ibana: "Ndang tarusung sasada ahu be sandok bangso on, madokdokhu do i di ahu" (ayat 14). Alai ndang dipasombu Debata sasahalaksa mangadopi bangso i, diurupi Debata do si Musa. Dihatahon Debata ma tu si Musa asa dipapungu ma pitu pulu halak sian sintua ni halak Israel. Laos dipasahat ma nasida tu Debata. Dung pungu nasida tuat ma Debata laos dibuat Debata ma tondi na songgop tu si Musa, jala diampehon tu nasida. Ulaon ni tondi na dipasahat Debata tu si Musa laos songon i do pasahaton ni Debata tu angka sintua na pitu pulu i. Laho pasauthon sangkap ni Debata, i ma mangusung sianjuon di bangso i, asa unang be sasada ni si Musa mangusungsa jala mandongani bangso ni Debata sahat tu inganan na pinasahat ni Debata.
HATORANGAN
1. Tondi ni Debata na Manggohi jala Mangula (ayat 24-26).
Dipatorang turpuk on do pangoloion jala haunduhon ni si Musa maradophon Debata. Tutu do na ginohan ni tondi do si Musa laho mangulahon parsuru ni Debata na tu ibana maradophon angka pitu pulu sintua ni Israel dohot saluhut bangso Israel. Debata do na pasahathon ulaon manurirangi tu pitu pulu sintua naung disonggopi tondi na binuat ni Debata sian si Musa. Ndang na mandok na so martondi be si Musa ala naung dibuat Debata sian ibana laos dipasahat tu na pitu pulu sintua ni Israel. Na naeng dipasahat di si i ma, songon tondi na sahat tu si Musa, songon i do tong lehonon ni Debata di angka sintua i asa manurirangi nasida tu bangso i. Dipasahat angka pangantusion di Hata ni Debata asa torop nasida laho manurirangi di tongatonga ni bangso i. Asa marsiurupan nasida, asa umneang ulaon panghobasion di bangso i. Parguruon ni tondi i do nasida laho manghatahon nasa hasintongan ni Debata tu bangsoNa. Asa i ma diparguru jala diulahon nasida di angka parsuru ni Debata tu nasida.
2. Tondi ni Debata na so Tarbatas (ayat 27-28).
Pangantusion dohot parbinotoan ni jolma ndang boi mangambati jala mambatasi parsaoran Tondi ni Debata. Si Eldad dohot si Medad na sian pitu pulu sintua i, manurirangi do nasida dung ruar tu undungundung i di bagasan parsaroan i. Sian turpuk on dipatorang do pangulaon ni Tondi ni Debata di si Eldad dohot si Medad. Manongtong mangulon tondi i di atasnasida. Mangula do Tondi i, gabe hobas jala malua sian hatahutan jala ndang marna loja nasida manurirangi.
Dirajumi si Josua, anak ni si Nun asa diambati nian nasida na manurirangi di bagasan parsaroan i. Sian pangantusionna do pandohanna i. Hasomalan hatiha i, sian bagas joro ni Debata do uli jala denggan panjaloon manang hasasaor ni Tondi i. Inganan poti parpadanan pe di bagas joro ni Debata do. Didok roha ni si Josua, asa unang ma nian diboanboan angka ulaon bagas joro tu angka luat na asing manang di luar ni bagas joro. Hasomalan na diida jala naniula ni hajolmaon, olo do dipangke Debata. Alai olo do gabe sipangambati molo mangasahon pangantusion ni hajolmaon. Gabe marsipangasahon na binotona jala gogona dibahen mangatur angka ulaon bagas joro. Tondi ni Debata ndada sian parsuru manang na niaturhon ni jolma, alai Debata Jahowa do mangondihon i tu ganup naung pinillitNa jala di dia pe inganan hasahatan ni Tondi i, saguru di Debata do. Huaso dohot hagogoon ni Debata ndang tarbatas jala saguru di Ibana do laho pasauthonsa.
3. Basabasa ni Debata do Hasosonggop ni TondiNa (ayat 29-30).
Dialusi si Musa do na nidok ni si Josua i (ayat 29). Dipatorang si Musa, asa diantusi ndada sian gogona na tuk patupahon parsuru ni Debata, marhite hasososonggop ni TondiNa do di atasnasida. Dipangido si Musa do tu adopan ni Debata, asa adong na mandongani ibana manguluhon bangso Israel. Laos dipataridahon Debata do i di jolo ni si Musa dohot saluhut bangsoNa. Basabasa ni Debata do di na songgop TondiNa di atas ni angka naung pinillit i. Marhite basabasa ni Debata di na songgop TondiNa i, marpanghorhon ma i di ngolu, asa diingot:
1) Tuhan i do Tondi i; jala ia disi Tondi ni Tuhan i, disi do haluaon. Alai anggo hita saluhutna angka na sinondangan ni hasangapon ni Tuhan i, so huphup bohinta, paubaonNa ma hita, gabe tudos tu rupaNa, mandapothon ragam ni hasangapon marguru tu Tuhan ni Tondi i (2 Korint 3:17-18).
2) Basabasa na nilehon ni Debata marhite TondiNa i, gabe marhapistaran ma, marhapandean dohot marparbinotoan di bagasan saluhut ulaon i (2 Musa 31:3).
3) Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton (2 Timoteus 1:7).
4) Dibasabasahon Debata do ragam ni halalas ni roha dohot dame, asa lam sumurung marpanghirimon, pinargogoan ni Tondi Parbadia (Rom 15:13).
5) Songgop do Tondi ni Tuhan Jahowa asa mamaritahon barita na uli tu halak na dangol, pauliuli parroha na bojok, maningtinghon haluaon tu halak na tarhurung dohot tu halak na tarrante, maningtinghon taon parasinirohaon sian Jahowa, mangapuli halak na marsak dohot angka na asing (ida Jesaya 61).
6) Marparbue do nang ulaon ni Tondi i, parbuena i ma: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon (Galatia 5:22).
HAHONAAN
Di parngoluan si nuaeng on ulaon ni Tondi, tarida do i marhite haporseoanta na marpanghirimon na mangolu. Gabe mamaritahon Barita na Uli sahat tu tingki nuaeng pe. Marhite Tondi i do umbahen dipapatar Debata tu hita ragam silehonlehonNa. Gabe adong di hita angka parbinotoan dohot habisuhon, hagogoon dohot habasaon, hadameon dohot ragam ni pasupasuNa. Na mangolu do Tondi ni Debata di parngoluon ni angka na porsea. Gabe ngolu na gok hadameon jala manghamauliatehon denggan basa ni Jahowa. Ndang be holsoan manang mabiar hita di ngolu on jala gok las ni roha do ngoluna.
Ndang gabe sipangambati hita di parsaoran ni Tondi i di ngoluta. Ai Tondi i do na mangarajai di bagasan roha, pingkiran dohot nasa ngolunta. Tarida do i di angka ulaon ni Tondi na sai mangalehon holong dohot hadameon, las ni roha dohot na asing. Dibahen i unang ma nian sumurut ringgasta mangulaon angka na denggan di tongatonga ni parsaoranta. Dipaholang ma angka parmusuon, parsalisian dohot angka na manegai nasa parsaoran na pinatomu ni Tondi i. Songon i do nang di Huria ni Tuhan i, na denggan do dilehon Debata di parsaoranta marhite bagas joro ni Tuhan i. Sian i do botoonta hasintongan dohot Hata ni Debata na dibaritahon tu hita asa di bagasan hadameon dohot hasonangan na sian Tuhan i. Tapaholang jala tapadao ma sian ngolunta angka parbolatbolaton dohot nasa parsalisian nang sian tongatonga ni huria ni Tuhan i.
Tajangkon ma di ngolunta pandonganion ni Tondi ni Tuhan i. Asa ndada marguru be sian lomo ni rohanta, alai marguru tu lomo ni roha ni Debata do. Na mangula jala didongani Tondi ni Tuhan i do hita asa antusanta marnida dohot mangulahon angka lomo ni roha ni Debata di ngolunta. Tondi ni Tuhan i do na patuduhon haluaon. Ala ni i ndang gabe sipangambati hita di angka na denggan sian pangulaon ni Tondi i hita. Amen. (rrs)
Posting Komentar