EPISTEL MINGGU 18 JUNI 2023
SATIA MANGULAHON HATA NI DEBATA
Jakobus 2:14-17
Minggu 2 Dung Trinitatis
TURPUK
Aha ma gunana ale angka donganhu molo didok halak, di ibana do haporseaon alai ndang adong di ibana pangulaon? Tarbahen do haporseaon i paluahon ibana? Molo adong dongan baoa manang boruboru na marsaemara jala hurangan di sipanganon siap ari, gabe adong na mandok sian tongatongamuna: Laho ma hamu mardamedame, las ma hamu, bosur ma hamu; alai ndang dilehon hamu tu nasida na ringkot di daging, aha ma gunana? Haporseaon i pe songon i do: Anggo so adong pangulaonna, naung mate do hadirionna.
PATUJOLO
Uju di huria na parjolo Buku Jakobus on digoari do surat-surat am (umum), ala disurathon ndada holan tu sasahalak manang bersifat lokal alai ditujuhon do tu sude halak na porsea jala tu angka na porsea na adong di parserahan (ida Jakobus 1:1).
Hatiha i godang do halak na margoar Jakobus, isarana songon si Jakobus anak ni si Sebedeus dongan saama ni si Johannes (ida Markus 15:40, Mateus 10:2, 27:56) dohot si Jakobus anak ni si Alpeus (ida Mateus 10:3, Markus 3:18, Ulaon ni Angka Apostel 1:13). Alai molo si Jakobus na manurathon buku on i ma anggi ni Jesus (ida Markus 6:3). Ndang masuk tu bilangan ni na sampulu dua Apostel i molo si Jakobus anggi ni Jesus. Alai dung jumpang ari palimapuluhon (Pentakosta) si Jakobus do na gabe songon tiang partunggul di halak Kristen di Jerusalem (ida Galatia 1:19, 2:9-12) jala tardok halak na ringkot do si Jakobus hatiha i, songon di na masa parpunguan na parjolo ni angka apostel di Jerusalem (ida Galatia 2:1-10).
Na gabe ondolan ni buku on i ma, ingkon manghorhon haporseaon do di angka ulaon na denggan.
HATORANGAN
Molo taparateatehon turpuk on, tangkas do dipatuduhon hasadaan ni haporseaon dohot pangulaon. Molo di hata Gorik hata haporseaon didok ma i pistis lapatanna haporseaon, pos ni roha, hasatiaon dohot hapatean. Jala hata pangulaon didok ma i ergon lapatanna karejo, ulaon dohot pambahenan. Disulingkiti tupuk on do, taringot tu songon dia ma haporseaon i molo ndang tarida parulaanna, tung tarbahen ni haporseaon si songon i ma lao paluahon? Lapatanna disi, molo haporseaon i ndada holan hatahata sambing na so adong tarida parulaonna (ayat 14).
Dipatudos si Jakobus do haporseaon na so marniula i songon: Molo adong ma sahalak baoa manang boruboru na marsaemara jala hurangan di sipanganon siap ari, alai holan hata sambing ma na ro sian halak mandok dirina halak na porsea jala didok tu nasida: Laho ma hamu mardamedame, las ma rohamuna, bosuron ma hamu, alai ndang adong nilehon agia aha na ringkot di dagingna, aha ma gunana? Ninna si Jakobus (ayat 15-16). Lapatanna unang ma dipangke jala didok dinina halak na porsea hape pasidinghon diri sian ulaon pangurupion di hajolmaon dohot pangurupion tu angka na pogos, na metmet jala na hurangan. Gariada, lam porsea hita tu Tuhan i, lam tarida ma nian haporseaonta i marhite ulaon mangurupi angka dongan, patupahon na ringkot di hajolmaon, di angka na humurang, nang di ulaon pangurupion di angka jolma.
Didok si Jakobus di turpuk on, haporseaon na so adong parulaonna naung mate do hadirionna. Haporseaon na so adong parulaonna didok do i naung mate. Di hata Gorik didok ma i nekros lapatanna mate jala ndang marhosa. Sian on boi ma antusanta, paboa haporseaon na so adong parulaonna di adopan ni Debata, dos do i songon haporseaon naung mate jala haporseaon na so marhosa, ndang mangulahon agia aha (ayat 17). Jala ndang adong gunana, molo naung mate do haporseaon i, boi dohonon tudos ma i tu na so marhaporseaon.
HAHONAAN
Hombar tu ondolan ni Epistelta di Minggu sadari on, "Satia Mangulahon Hata ni Debata" diarahon do hita asa mangulahon Hata ni Debata di bagasan hasatiaon. Lapatanna halak na paotootohon dirina do molo sai didok ibana halak na porsea alai ndang adong hataridaan, pambahenan dohot pangulahonon ni haporseaon i di ngolu siapari. Jala haporseaon na so adong parniulaanna dipatudos do i songon haporseaon naung mate.
Ingkon lam taantusi do, haporseaon na sintong, ingkon tarida do ulaonna, pambahenanna di angka dongan na humaliang lumobi ma di angka halak na pogos jala na metmet. Jadi boi do sipata, nian molo di daging ni hajolmaon mangolu dope hita, alai molo haporseaonta nunga mate be, bahkan nunga leleng mate, ala ndang adong hataridaan, parniulaan ni haporseaon i. I do umbahen na diarahon turpuk ni Epistel on hita asa unang ma holan hatahata haporseaonta i, alai tarida ma nian di parniulaon, manang ingkon mangulahon Hata ni Tuhan i ma hita tanda ni haporseaonta. Jala i ma na gabe patuduhon paboa halak na satia hita mangulahon Hata ni Debata. Amen. (ejs)
Posting Komentar