EPISTEL MINGGU 25 JUNI 2023
MANGIHUTHON JESUS JALA MAMORSAN SILANG
Jeremia 20:7-13
Minggu 3 Dung Trinitatis
TURPUK
Dihata i ho ahu ale Jahowa, jala olo ahu hataanMu. Gumogo do Ho sian ahu jala monang do Ho; hape gabe sirehereon ahu ganup ari; tung saluhut nasida mangarehe ahu. Ai ganup manghuling ahu, ingkon anggukhononhu do: Pangarupaon dohot hamagoan; ai hata ni Jahowa manjadi di ahu gabe pangareheon dohot insakinsak ganup ari. Jadi ningku ma: Ndang be taringotanhu Ibana, jala ndang be ahu marjamita marhitehite goarNa, hape gabe songon api na marsigorgor di bagasan rohangku huhilala, tarhurung di bagasan holiholingku, siol mandate ahu mangotapotapi, hape ndang tarbahen. Ai hubege do hatahata ni torop halak: "Biar humaliang. Tuduhon ibana. Itatuduhon ma ibana." Saluhut jolma alealengku mangonggop di lambunghu: "Anggiat tung tartangkup ibana, asa itapatunduk ibana, jala martubol hita tu ibana." Alai Jahowa do mandongani ahu, songon ulubalang na begu, dibahen i ingkon tarsulandit angka na mangalele ahu, jala ndang tagamon monang; murak situtu do nasida tahe, ai ndang mardohar nasida, haurahon na saleleng ni lelengna, na so tagamon lupa mangonai tu nasida. Tongon tahe ale Jahowa Zebaot, Ho do na manguji halak na tigor, na marnida piapia dohot ateate. Sai idaonhu do partubolanMu songgop tu nasida, ai nunga tu Ho hugiling parbadaanhu. Marende ma hamu di Jahowa, puji ma Jahowa, ai nunga dipalua Ibana tondi ni halak na pogos sian tangan ni angka parjahat.
PATUJOLO
Panurirang Jeremia i ma anak ni Malim Hilkia di Anatot di luat Benjamin (ida Jeremia 1:1). Jeremia dipabangkit gabe panurirang di angka ari ni si Joiakim, anak ni si Josia, raja sian Juda sahat ro di ujung ni pasampulusada taonhon hinarajahon ni si Sedekia, anak ni si Josia, raja ni Juda, sahat ro dihabubuang ni Jerusalem palimabulanhon (ida Jeremia 1:3).
Sada halongangan na pinatupa ni Debata tu si Jeremia, i ma "tagan so dijadihon ibana di bortian nunga ditanda jala nunga diparbadiai Debata si Jeremia, huhut dipabangkit ibana gabe panurirang tu angka bangso" (ida Jeremia 1:5). Disoarahon Debata do tu si Jeremia, asa unang mabiar ibana maradophon manang ise pe, ala Debata do donganna jala na paluahon ibana (ida Jeremia 1:8). Dipabangkit Debata ibana laho mangurati dohot maniaphon, mangago dohot mangalaho, paulihon dohot manuan (ida Jeremia 1:10). I ma padan ni Debata tu si Jeremia.
Di na mandalanhon ulaonna na gabe panurirang di tongatonga ni Bangso Israel, marragam do angka hamaolon dohot hasusaan na niadopan ni si Jeremia. Ndang adong jumpang hasatiaon di bangso Israel maradophon Debata. Tongtong dope nasida manomba jala mamele ganaganaan, huhut marmainan nasida dohot jolma ni na asing atik pe naung di tano habuangan nasida. Ala ni i, mangalualu ma panurirang Jeremia tu Debata ala ni dokdok ni ulaon na pinasahat ni Debata tu ibana. Boasa ma masa na so songon i di nasida? Tapaihutihut ma hatorangan turpuk ni Epistel on.
HATORANGAN
Molo taringot tu hatoguon mangadopi pergumulan na masa di tongatonga ni ngolu adong do sada cerita. Di sada partingkian adong ma sahalak ama na mansai ponjot parngoluonna dihilala ibana. Adong haporsuhon, hamaolon di kondisi ekonomi, keluarga dohot angka sisolhot na asing. Sai marpingkiri ma ibana: "Tu ise ma naeng ceritahononhu sude na ponjot na di rohangkon? Asa songon na lumbang jo huhilala jala asa adong muse angka na mangalehon masukan laho pasidunghon angka parsoalan on." Ingot ma ibana tu Pandita na manghobasi di hurianasida. Dihubungi ibana ma Pandita i, asa adong ma nian tingki asa boi ibana ro tu bagas ni Amang Pandita, laho marcerita di angka parsoalan na losok di rohana. Dung dihubungi, manghatai ma nasida jala dipatupa ma sada partingkian asa pajumpang.
Dung i pajumpang ma sahalak ama on, di bagas ni Amang Pandita. "Masuk amang! Silakan duduk!" Didok Amang Pandita i. Dung hundul sahalak ama i, didok Pandita ma tu ibana: "Andorang marcerita amang taringot na masa di bagasan ngolu ni amang, parjolo ma hita martangiang." Dung sidung martangiang, dilehon Pandita i ma tingki tu amang i laho marcerita. Marcerita ma sahalak ama i, huhut ma dibege Pandita.
Dung sidung sahalak ama i marcerita, ditogihon Pandita i ma ibana tu dapur. Sai sungkunsungkun ma di bagasan roha ni amang na marcerita on: "Boasa diboan ahu tu dapur?" Dung sahat di dapur dibuat Pandita i ma dua panci, jala dipeakhon ma panci on di ginjang ni dua kompor gas. Dung i diisi ma aek tu bagasan panci on, huhut ma dibuat sada wortel dohot sada tolor sian kulkas. Disungkun Pandita i ma tu sahalak ama i: "Songon dia ma didok rohamuna wortel on amang?" Dialusi sahalak ama i ma, "Pir do i amang Pandita." "Molo tolor on?" didok Pandita i muse. "Ba molo di bagasan tolor i cair do i amang," ninna sahalak ama i mangalusi. Sai marpingkiri ma ama na marcerita i: "Ai aha do lapatan ni sungkunsungkun ni Amang Pandita on?" sai ninna di bagasan rohana.
Dung i dipagalak ma kompor gas na dua i. Dung marsigorgor aek na di bagasan panci i, dipamasuk Pandita i ma tu kompor na sada, i ma wortel jala di kompor na sada nari, i ma tolor. Dung pigapiga menit, dipamate ma kompor gas na dua i huhut diangkat ma wortel dohot tolor i. Disungkun Pandita i ma tu sahalak ama i: "Songon dia ma saonari wortel on amang?" "Gabe lembek ma antong amang," ninna mangalusi. "Songon dia ma muse dohot tolor on amang?" disungkun Pandita i. "Gabe karas/padat do amang," ninna mangalusi.
Laos didok Pandita i ma tu sahalak ama i: "Amang, tapatudos ma aek na marsigorgor i songon angka hamaolon, haporsuhon dohot angka pergumulan na adong di bagasan ngolum. Saonari na dia ma pillitonmu amang? Na lam lembek do paboa naung sumurut haporseaonmu songon wortel i? Manang lam togu manang tang do songon tolor i di na mangadopi hamaolon, haporsuhon dohot pergumulan na adong di bagasan ngolum? Pangidoannami tu hamu amang anggiat ma nian lam togu jala tang huhut margogo hamu mangadopi saluhutna. Ingot hamu ma, jumolo do Ibana (Jesus) mamorsan saluhut sitaononta. Boan ma saluhutna holso ni roham tu Ibana, asa margogo hamu mangadopi saluhut na masa."
Dung i ditogihon Pandita i ma sahalak ama i tu ruang tamu huhut hundul. "Mauliate ma Amang Pandita, di saluhut angka gombaran dohot tangiang na pinasahatmuna. Lam tenang ma pingkiranhu mangadopi saluhutna. Marhehe na uli ma ahu da amang." Dung i didok Pandita i ma tu sahalak ama i: "Andorang marhehe na uli hamu amang, martangiang ma hita." Dung simpul martangiang, marhehe na uli ma sahalak ama i huhut dipahusorhusor ma saluhutna i di bagasan rohana.
Di turpuk ni Epistelta on didok Panurirang Jeremia do na ingkon idaonna do partubolon ni Jahowa tu angka halak na mangharingkothon hosana. Hata panguhuman do na sai pinabotohon ni si Jeremia tu bangso i. Umbahen i do asa gabe sirehereon ibana ganup ari jala ganup bangso i mangarehei ibana.
Alai nang pe songon i maningon pasahatonna do hata ni Debata. Ai ganup dipingkiri ibana asa unang be marjamita ibana narhite goar ni Debata gabe sai hira api na marsigorgor do dihilala ibana di bagasan rohana. Ndang tarbahen ibana laho manggotapi hata ni Debata. Umbahen i do asa sai torus dipasahat ibana hata ni Debata nang pe angka hata uhum. Jala pos do rohana sai na donganan ni Debata do ibana jala Debata do na martubol dompak angka halak na mangalele ibana.
Alai nang pe dipasahat Debata angka hata uhum marhite si Jeremia, tong do dipasahat muse dalan hangoluan. Dielek si Jeremia do bangso i asa maporus sian huta Jerusalem, ala ingkon lengsehonon ni Nebukadnesar, raja sian Babel ma huta i dohot Bagas Joro ni Debata. Hape ala ni hata i gabe didok halak do na pengkhianat si Jeremia jala dipungkul si Pashur ibana jala dibahen ibana tu hurungan na di harbangan Benjamin parjulu i, di bagasan bagas ni Jahowa.
Nang pe ditadinghonnasida padan tu Jahowa jala marsomba tu angka debata sileban huhut mangoloi nasida (ida Jeremia 22:9). Alai manongtong do asi ni roha ni Debata di bangso i sahat tu habuangan Babel. Pitu pulu taon ma lelenga bangso i tarbuang tu Babel (ida Jeremia 25:12). Alai sai na marpangulahi do roha ni Debata tu bangsoNa i jala ro ma Ibana laho papunguhon nasida muse asa mulak tu ganup partalianna jala tu ganup tanona (Jeremia 12:15). Manongtong do asi ni rohaNa tu bangso i.
Ala dioloi panurirang Jeremia pandohan ni Debata, gabe sirehereon ni na torop ma ibana ganup ari, ai ganup mangkuling ibana, ingkon anggukhononna do: Pangarupaon dohot hamagoan; ai hata ni Jahowa manjadi di ibana (ayat 8). Gabe jolma na lea do ibana ala barita hatigoran na binaritahonna. Gok pangareheon dohot insakinsak ganup ari do dijalo ibana (ayat 8–9).
Molo sian hajolmaon ndang margogo si Jeremia sasintongna, alai tongtong do ibana pasahathon saluhutna tu Tuhan i. Torop do jolma tingki i na manghalomohon asa madabu si Jeremia ala mamaritahon hata ni Tuhan i (ayat 10). Alai dipasahat si Jeremia do saluhutna i tu Jahowa Debata, porsea do ibana paboa sai donganan ni Jahowa do ibana jala Debata do na tuk mamaloshon saluhutna tu angka na marmusu dompak ibana (ida ayat 11-12 jala patudos Rom 12:19). Didok si Jeremia muse "marende ma hamu di Jahowa, puji ma Jahowa, ai nunga dipalua Ibana tondi ni halak na pogos sian tangan ni angka parjahat" (ayat 13). I ma pos ni rohana jala pamujionna di Debata ala naung pinalua ni Debata ibana sian tangan ni angka parjahat.
HAHONAAN
Damang/dainang na hinaholongan di bagasan goar ni Kristus, sadari on tamasuki do Minggu Patoluhon Dung Trinitatis. Jala di Minggu sadari on dipangkulingi hita sian turpuk ni Epistel songon panindangion ni si Jeremia taringot tu na masa di ngoluna di na pasahathon hata ni Tuhan i ibana. Ala hata ni Debata na pinasahatna gabe sirehereon ibana ganup ari, alai pos do rohana di Debata. Debata do na tuk mandongani ibana jala pasalpuhon sude angka parmusuon ni angka halak dompak ibana. Jadi margogo ma ibana asa torus mamaritahon hata ni Debata. Dienet do turpuk Epistelta sian Jeremia 20:7-13 jala dibahen ojahanna "Mangihuthon Jesus jala Mamorsan Silang." Aha ma na boi gabe sipeoponta marhite hatorangan ni Epistel naung dipatorang di ginjang i asa tahangoluhon di ngolu siap ari, songon on ma:
1. Unang ma hita manimbil marsomba tu debata sileban manang aha pe na masa di bagasan ngolunta on. Songon na masa di bangso Israel, di na muramura bangso i manimbil sian Tuhan i. Alai aha pe na masa ingkon Tuhan i do na taihuthon. Tung na so jadi hita marbalik tu debata na asing.
2. Tatanda ma Ibana di bagasan ngolunta. Unang holan sekadar taboto, alai ingkon tangkas ma panandaionta di Ibana di bagasan ngolunta on. Ai Ibana do na mandongani hita di na songon dia pe parsoalan na taadopi. Jala Ibana do na martubol dompak angka musunta.
3. Sada parsiajaran na mansai arga di hita sian turpuk on asa sai tongtong ma hita marbarita na uli, une manang na so une pe tingkina (ida 2 Timoteus 4:2). Manang di dia pe hita tongtong ma hita mamaritahon hata ni Debata jala sai tong ma satia hita di Ibana. Amen. (rml)
1 komentar
Bisa posting yang bahasa Indonesia epistel 2 Juli dri matius 10: 40- 42