JAMITA MINGGU 25 JUNI 2023
MANGIHUTHON JESUS JALA MAMORSAN SILANG
Mateus 10:32-39
Minggu 3 Dung Trinitatis
TURPUK
Ai ganup na manghatindanghon Ahu di jolo ni jolma, i do hatindanghononHu di jolo ni Damang na di banua ginjang i; alai ganup na mansoadahon Ahu di jolo ni jolma, laos soadahononHu do i di jolo ni Damang na di banua ginjang i. Unang ma dirimpu rohamuna, na mamboan dame Ahu umbahen na ro tu tano on; ndada na ro Ahu mamboan dame, tung podang do. Ai na ro do Ahu pabadahon anak tu amana, boru tu inana, parumaen tu simatuana boru; jala tung donganna sajabu gabe musu ni jolma i. Na humolong roha di amana manang di inana asa di Ahu, ndang tama i siseanHu; jala na humolong roha di anakna dohot di boruna asa di Ahu, ndang tama i siseanHu. Jala na so mamorsan silang na tu ibana i laho mangihuthon Ahu, ndang na tama i siseanHu. Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot.
PATUJOLO
Adong do sada cerita taringot tu hariringkot ni hasatiaon di na mamorsan silang. Di sada partingkian adong ma sahalak na manghatai dohot surusuruan ni Debata. Disungkun surusuruan i ma, ninna: "Satia do ho tu Tuhan Jesus?" Laos dialusi na sahalak i ma, didok: "Na satia do ahu sahat ro di ujung ni ngolungku." Laos dialusi surusuruan i ma muse: "Molo na satia do ho tu Ibana, olo do ho husuru?" Dialusi na sahalak i ma muse: "Aha ma na naeng suruonmu tu ahu?" Laos didok surusuruan i ma: "Disi adong silang ganjangna dua meter. Olo do ho mamorsan silang i, manaripari batang sunge annon di joloan?" Dibereng na sahalak i ma. Dipingkiri rohana mandok, "ndang na borat nian silang i, ai sian hau do, tontu neang ma." Di bagasan roha na togu didok na sahalak i ma mangalusi: "Na olo do ahu." Jadi diporsan na sahalak i ma silang i.
Hira dung adong mar satonga jom dung diporsan ibana silang i, songon na borat do dihilala ibana. Hirim rohana anggiat ma nian adong sada huta asa mangido aek sitiotio ibana. Adong ma sada huta dibereng ibana jala las situtu rohana. Ro ma ibana mandapothon sada bagas, dituktuki ibana ma bagas on. Ruar ma pangisi ni bagas i. Didok na sahalak i ma: "Boi do ahu mangido aek sitiositio inang? Nunga mauas panghilalaanhu." Dialusi inang i ma mandok: "Boi amang, satongkin asa hubuat, masuk ma hamu tu bagas." Dialusi na sahalak i ma muse mandok: "Mauliate ma inang dison ma ahu." Dialap inang i ma aek sitiotio, jala dipasahat tu na sahalak i.
Mansai las rohana dung diinum ibana aek i. Didok ibana tu inang i: "Mauliate ma inang!" Dung i didok ibana ma muse: "Boi do ahu maminjam gargajimuna inang?" "Laho tu aha i amang?" didok inang i. "Laho manggargaji silang on inang," ninna na sahalak i ma. "Satongkin da amang asa hubuat," ninna inang i. Dung i dipasahat inang i ma gargaji i, laos digargaji na sahalak i ma silang i, diorui ma ganjangna mar dua pulu lima centi meter, asa songon na neang didok rohana. Dung i dipaulak na sahalak i ma gargaji i, laos didok mauliate. Laos marhehe na uli ma ibana.
Di pardalanan uju na diporsan na sahalak i silang i dihilala ibana songon na sarupa dope boratna, atik pe naung diorui ibana ganjangna. Dihirim rohana muse asa adong ma nian sada huta, asa boi ibana mangido aek sitiotio huhut mangido gargaji. Adong ma dibereng ibana sada huta, laos diebati ibana ma sada bagas, huhut ma dipangido aek sitiotio dohot gargaji. Dung dijalo ibana gargaji sian pangisi ni bagas i, digargaji ibana ma muse dua pulu lima centi meter nari silang i. Didok rohana asa tung tamba neang nian porsanonna silang i. Dung i didok ibana ma mauliate jala marhehe na uli ma ibana. Diporsan ibana ma muse silang i. Alai dihilala ibana tong dope songon na sarupa boratna, sai hira na so adong moru.
Dihirim rohana muse asa adong ma nian huta asa dipangido ibana aek sitiotio dohot gargaji. Lobi sian sajom ibana mamorsan silang i. Adong ma sada huta dibereng ibana, jala dituktuhi ibana ma sada bagas, laho mangido aek sitiotio dohot gargaji. Dung dipasahat pangisi ni bagas i aek sitiotio dohot gargaji, digargaji ibana ma lima pulu centi meter ganjangna. Di pingkiranna nunga be umneang. Dung i didok ma mauliate laos marhehe na uli ma ibana jala diporsan ma silang i. Alai dihilala ibana tong do songon na sarupa boratna, ndang na moru.
Di na mamorsan silang i ibana, dibereng ibana ma adong sada sunge, songon pandok ni surusuruan i. Didapothon surusuruan i ma ibana jala didok surusuruan i: "Mauliate ma hudok tu ho, ala naung diporsan ho silang i sahat tuson. Saonari bahen ma silang i gabe sada titi, asa boi ho manaripari batang aek on. Jarak ni sunge i tu bariba hirahira sada satonga meter ma, silang na pinorsan mi dua meter ganjangna, boi do ho manaripari batang aek i marhite silang i." Di na didok surusuruan i songon i diingot ibana ma, naung piga hali diorui ibana borat ni silang i marhite na digargaji. Parjolo dohot paduahon dua pulu lima centi meter ganjangna jala lima pulu centi meter ma na patoluhon. Jadi nunga adong saratus centi meter manang sameter naung digotap ibana. "Beha nama on?" inna rohana.
Didok ibana ma tu surusuruan i: "Ndang boi hubahen silang on gabe titi asa boi ahu manaripari batang aek on." "Boasa?" disungkun surusuruan i. Dialusi na sasada i ma mandok: "Di tonga dalan nangkin adong hubereng sada huta, taripar ma ahu tu si jala hugargaji sameter ganjang ni silang i." "Boasa gargajionmu?" dialusi surusuruan i. Dialusi ibana mandok: "Siala mansai borat do huhilala huporsan silang i." Umbege i ro ma rimas ni surusuruan i, didok ma: "Nangkin di mula na i didok ho na boi do ho mamorsan silang i jala manaripari batang aek i! Marhapatean tu ho ma saluhutna na niulami!" Laos manetek ma iluna huhut manungkap manolsoli pangalahona. Martangiang ma ibana tu Tuhan i ala saluhut na masa i. Dipasahat Tuhan i do asi ni rohaNa tu jolma i, nang pe ndang satia ibana laho mamorsan silang i sahat ro di ujungna.
Sian cerita on, tangkas do dipaboa asa tongtong hita satia mamorsan silang i, asa tama hita gabe siseanNa. Songon dia do ulaning asa tama hita gabe siseanNa. Tapaihutihut ma hatorangan ni Jamita on.
HATORANGAN
1. Sotung Tasoadahon Jesus (ayat 32–33).
Di ayat on dipasahat Jesus do poda tu angka siseanNa asa tongtong manghatindanghon Ibana di jolo ni jolma. Molo disoadahon jolma i do Ibana, ndang hasalaan na metmet i, laos soadahonon ni Jesus do tong di jolo ni Damang na di banua ginjang i. Sian na nidok ni Jesus on, tangkas do dipatuduhon, mansai denggan do hasadaan ni Damang na di banua ginjang i dohot Jesus (patudos Johannes 17:21). Jadi, manang ise jolma na patupahon hasalaan maradophon Jesus, tong do sala i di jolo ni Damang i.
2. Tarsirang do Halak na so Mangihuthon Kristus Maradophon Halak Siihuthon Kristus (ayat 34–36).
Hata 'podang' di ayat 34 on dipatudos ma i songon haroro ni Jesus tu portibi on, i ma manirang angka parsalisian di ganup jolma na di portibi on. Nasa parsalisian ingkon boi do dipature dohot denggan marhite dame dohot holong na sian Tuhan i. Molo tongtong dope adong 'podang' di bagasan pamatangta, aha ma labana gabe siihuthon Kristus hita. Molo songon i do, sarupa dope hita dohot pangalaho ni portibi on. Didok di Heber 4:12 "Ai na marngolu do hata ni Debata jala marpanghorhon, jala tumajom sian nasa podang siduababa, jala torus do disirang hosa dohot tondi, ringring dohot utokutokna, laos diuhumi do na sinangkap dohot na piningkir ni roha."
Na nidok ni Jesus di ayat 35 on, nunga diturpukhon di Mika 7:6 "Ai anak i paotootohon amana, boru i hehe dompak inana, parumaen dompak simatuana boru, musu ni baoa i, i ma angka halak donganna sajabu." Sian na didok di ayat 35 on botoonta ma paboa di na dibaritahon Jesus tu sada punguan manang keluarga, sai adong do na porsea dohot na so porsea di Ibana. Ganup na porsea di Jesus, ingkon pillitonna do ise na naeng siihuthononna, Jesus do manang na asing, ndang boi mardua roha. Tarlumobi ma molo na gabe sipangambati haporseaonta di Jesus do angka na rap dohot hita.
Molo taringot tu na mangihuthon Jesus do, adong do jolma na mangihuthon Ibana jala adong do na so mangihuthon Ibana. Ala ni i do asa gabe marsirang angka na marsitandaan, na marsihaholongan ala adong na porsea, na manjangkon Jesus jala adong na so porsea na so manjangkon Jesus. Boasa adong parbadaan ni anak tu amana? Ala porsea nasida tu Jesus, ala porsea boru jala dijangkon Jesus, hape inana ndang manjangkon Jesus. Boasa disirang parumaen tu simatuana boru? Ala dijangkon parumaen i Jesus, hape simatuana boru ndang dijangkon Kristus.
Di Lukas 12:51 didok “Na dirimpu rohamuna do na laho mangalehon dame Ahu tu atas tano on umbahen na ro? Nda tung, Hudok ma di hamu: Panirangon do tahe." I do umbahen na didok Jesus di ayat 36 "jala tung donganna sajabu gabe musu ni jolma i."
3. Manghaholongi Jesus di Atas ni Nasa na Tahaholongi (ayat 37).
Molo adong sahalak na mangihuthon Kristus, ingkon patujoloonna do Kristus di ngoluna sian angka na asing, manang na ise pe i. Ingkon humolong do rohanta di Kristus, ala memang molo taihuthon Kristus ingkon togu do, ndang boi satongasatonga. Unang adong na gabe sipangambati di hita mangihuthon Kristus ala holong ni rohanta di na asing, na mambahen hita gabe dao sian Ibana. Molo holong rohanta di donganta sajabu ingkon humolong ma hita di Jesus, ingkon di ginjang do tabahen holongta di Jesus asing ni holongta di angka na tahaholongi.
4. Mamorsan Silang (ayat 38).
Didok mamorsan silang, i ma na gabe gombaran ni sitaonon ni angka na mangihuthon Kristus, na ingkon disirang do sian jolma na asing. Disirang ala na so olo na asing i mangihuthon Kristus. Manang aha pe na masa di bagasan ngolunta on, ingkon boi do hita manahan huhut mangulahon lomo ni roha ni Debata. Di ayat 38 on dipaboa do tu hita songon dia sahalak na tama gabe siseanNa, i ma halak na olo mamorsan silang i di bagasan ngoluna, jala olo disirang sian na asing.
5. Satia Mangihuthon Kristus (ayat 39).
Didok Jesus di ayat on, paboa halak na sumeahon dirina ala ni Jesus, i do na jumpangan ngolu di ari sogot. Lapatanna, di bagasan ngolunta on ingkon tabahen do Jesus di ginjang ni saluhut, asa dapotan hangoluan si salelenglelengna hita. Adong do jolma ala ni hasangapon, pangkat, hamoraon dohot angka lan na asing na adong di portibi on gabe "digadis" haporseaonna, gabe marbalik sian Kristus laho tu ugamo na asing. Di hita halak Batak, di sejarah ni hajongjongan ni Barita na Uli di Tano Batak taingot ma songon Parbarita na Uli Samuel Munson dohot Henry Lyman songon i nang Apostel ni Halak Batak i ma Ludwig Ingwer Nommensen na sumeahon ngoluna ala ni Kristus, laho marbarita na uli tu Tano Batak, gabe mate do nasida (martir) humophop Barita na Uli. Mansai ringkot do hita asa satia mangihuthon Kristus.
HAHONAAN
Damang/dainang na hinaholongan di bagasan goar ni Kristus, sadari on tamasuki do Minggu Patoluhon Dung Trinitatis. Jala di Minggu sadari on dipangkulingi hita sian hata ni Debata na pinasahat ni Jesus tu angka siseanNa uju na diparbohali nasida laho marbarita na uli. Dienet do i sian Mateus 10:32-39 jala dibahen ojahanna "Mangihuthon Jesus jala Mamorsan Silang." Aha ma na boi gabe sipeoponta marhite hatorangan ni Jamita naung dipatorang di ginjang asa tahangoluhon di ngolu siap ari, songon on ma:
1. Ingkon manahan ma hita di nasa ngolunta on manang aha pe na masa. Songon na nidok ni Buku Ende No. 149 "Ho Tongtong Ihuthononhu" ayat 3 "Manang aha pe na masa, las ni roha arsak pe. Tioponhu Ho na basa na marholong roha pe. Tung saleleng ahu mangolu, nang dung suda bohalhon. Ingkon Ho, o sipangolu, pujionhu sai tongtong." Naeng ma songon i tahangoluhon di nasa gulmit ni ngolunta.
2. Ingkon satia ma hita mangihuthon Ibana, mamorsan silang i sahat ro di ujung ni ngolunta pe.
3. Tatiop ma di ngolunta amang/inang asa songon na hinatindanghon ni si Josua di Josua 24:15 na mandok "alai anggo ahu dohot donganhu sajabu, ingkon Jahowa do oloannami." Taoloi ma Ibana di ganup ulaonta nang di ganup ngolunta sahat ro di ujungna. Amen. (rml)
Posting Komentar