EPISTEL MINGGU 9 JULI 2023
MANGHAHOLONGI UHUM NI DEBATA
Angka Ende 2:8-13
Minggu 5 Dung Trinitatis
TURPUK
Ndi, rupa soara ni hasudungan ni rohangku do i. Ida ma, nunga ro ibana maringkat sian angka dolok, marhajingjang di atas ni angka robean. Tudos do hasudungan ni rohangku tu sada hije, manang tu anak ni ursa. Ida ma, jongjong do ibana di balik ni dorpi, mandulo sian jandela, marlinanglinang ibana mandulo sian tarali. Dung i manghuling ma hasudungan ni rohangku, didok ma mandok ahu: "Hehe ma ho, ale hasoloan ni rohangku, na mauliutus, jala ruar ma ho! Ai ida ma, nunga salpu partaonan ngali ni ari, nunga mansohot dohot ari udan. Nunga pola mullop angka bungabunga di ladang, nunga jumpang tingki parendeon, nunga pola tarbege soara ni anduhur titi di tanonta i. Parbue ni hau ara pe nunga mamungka matoras, jala marbunga ia hau anggur, jala maruap na angur. Hehe ma ho, ale hasoloan ni rohangku, na mauliutus, jala ruar ma ho!"
PATUJOLO
Targoar do Buku Angka Ende on (Kidung Agung) angka ende na sian si Salomo. Ende ni angka ende na sian si Salomo (Angka Ende 1:1). Marharoroan sian hata Heber syir hasysyirim manang syiru i asyar, molo di Septuaginta (Bibel na marhata Latin) didok asma asmaton, lapatanna ende na mansai uli sian nasa ende (terakbar, teragung). Di angka pande ni Buku Padan na Robi didok do buku on na ginurithon ni Raja Salomo, manang angka ende na ditujuhon tu Raja Salomo, manang angka ende na mambahen Raja Salomo na gabe sentral manang tokoh utama di angka barita ni buku on.
Marharoroan do sian sude gaya syair ni angka ende on sian na masa di harajaon Juda, di pesta panen na dipatupa, na marisihon parolopolopon di bangso na manjalo dohot mamparsaulihon panghaholongion ni Debata, na manghaholongi bangsoNa songon sada rumang ni na mar rumah tangga (hubungan suami-isteri, laki-laki-perempuan yang sedang jatuh hati dan saling memperhatikan, saling mengasihi bahkan saling memberi diri satu sama lain).
Ende sian si Salomo on digurithon ma hirahira di zaman Helenis, ala dapot gaya Aramaisme (1:12; 2:7) dohot khas bahasa Gorik (3:9). Sr. Elliot manggombarhon tujuan manang rimpunan ni buku Ende sian si Salomo on ima: Menghormati dan meneguhkan keindahan dan tatanan yang diletakkan Allah dalam semua ciptaan. Allah, hikmat, tatanan dan kehadiranNya dapat ditemukan dalam segala sesuatu. Cinta yang bergelora, sesungguhnya, dengan mudah terbuka untuk mengenal ‘nyala api Yahweh’.” Di sude panompaon ni Debata na di portibion dohot ragam ni angka patik manang aturan na binahen ni Debata patandahon haholongan na satia laho mangatur jolma na tinompaNa I tu hadedenggan.panghaholongion ni Debata na mambahen jolma I gabe hasianNa sahat rodi gabe “oroan”, patuduhon naeng sude marture dibahen Debata parngoluan ni jolma di portibion.
HATORANGAN
1. Hasudungan ni roha i ro mandapothon hasoloan ni roha (8-10)
Sahalak na gabe hasudungan ni roha dison ima pangolin (laki-laki), na gabe hasoloan ni roha dison ima oroan (perempuan), keduanya saling memberi nama kebanggaan terhadap pujaan hatinya masing-masing. Digombarhon do hata hasudungan dohot hasoloan i sada hubungan na so tarsirang, naung martomu roha tu roha, angka na marsiantuasan na sada tu na sada na i, angka na martitolopan, dohot angka marsilehonan angka na denggan, jala angka na rap marparsaulihon. Di halak Israel digombarhon do pangoli i ima Debata dohot oroan i ima bangso i. Panindangion ni haporseaonnasida bangso Israel gabe oroan hasoloan ni roha ni Debata, jala bangso i mambahen Debata gabe hasudungan ni rohanasida. Angka dia do patandahon Debata na gabe hasudungan ni roha?
- Nunga ro ibana : pangoli i do jumolo mangalehon dirina, manghalojahon asa pajumpang dohot na hinalomohon ni rohana. Haroro ni Debata tu angka hasianNa jumolo do diaturhon saluhutna denggan, ima marhite panompaon ni Debata andorang so tartompa jolma na parjolo i di Taman Eden. Dungi diaturhon Debata ma saluhutna tartompa i asa marsilehonan diri, marsipaturean na sada tu nasa, mangalehon hangoluan, jala mardame sonang. Dungi, mansai denggan do diaturhon Debata angka ari di panompaon i, jala didok do: “Nunga denggan sude”. Asa tung taraur ngolu ni jolma na parjolo i jala sahat ro di ujungna asa sahat tu “denggan sude” dipatikhon Debata do taringot tu hangoluan dohot hamatean”. Hombar tu sangkap ni Debata ingkon ma sahat tu hangoluan i. alani do ditontuhon do diriNa na gabe dalan asa sahat tu tujuan semula dohot tujuan akhir ni jolma ima hangoluan.
- Harorona maringkat dohot marhajinjang: Ditompa Debata jolma i tumiru rupaNa tudos tu pangalahoNa. Ima na mabahen jolma gabe hasoloan ni roha ni Debata. Jolma gabe representasi di sude angka panompaon. Hadedenggan ni panompaon I tarida di hadedenggan ni pangalaho ni jolma i (hubungannya kepada Allah dan kepada sesama ciptaan). Sahat do dipatudos hasudungan i songon hije manang anak ni ursa. Hije sada binatang na marlojong mansai doras (cepat bertindak untuk mendapatkan keinginannya). Dihatindanghon do Debata na sai tongtong bertindak mambahen las roha manang marsonang-sonang saluhutna angka natinompaNa. Sian ‘dolok habadiaon’ ro Ibana mandulo angka na tinompaNa I jala na so tupa nok mataNa marnida saluhutna natinompaNa (pat. Ps.121:4).
Di sada bilut do oroan i marnida haroroni pangoli i. Pangoli (hasudungan) na ro mandapothon hasoloan marsoara: “Hehe ma ho, ale hasoloan ni rohangku, na mauliutus, jala ruar ma ho!”. Dihasiholi Debata do parjumpanganNa dohot jolma na tinompaNa. Alani dosa i gabe adong parsirangan ni jolma dohot Debata. Diusir si Adam dohot si Hawa sian porlak Eden i ala so mangihuthon patik I, jala disoadahon panghaholongion ni Debata naung mangaturhon angka na denggan saluhutna tu jolma na parjolo i. alani dosa i ndang tartondong ni jolma i be habadiaon ni Debata. Alai, Debata sandiri dibagasan holongNa na so tupa paholangjon diriNa sian jolma i. Ibana sandiri mambahen huhut patupahon pardamen tu jolma marhite Jesus Kristus. Dibagas bilut songon gombaran na sai adong do mambahen tembok pemisahan di jolma tu Debata. Nang pe marsigogor roha ni oroan naeng hatop pajumpang dohot pangoli i alai adong do bilut na ingkon sibolusonna asa boi secara langsung pajumpang. Ndang tarbahen ni jolma sian dirina laho mambolus ‘bilut’ na manabunihon ‘panghaholongionna’ maradaphon Debata. Alai Debata tung mansai tangkas do umboto roha ni jolma na manghasiholi Debata dibagasan ngoluna. Alani do didok: Hehe ma ho, ruar ma ho! Panghaholongion ni Debata tu jolma dipatuduhon marhite na diribak Ibana hirehire i asa unang adong na mangambati parjumpangan di holong na marsitomuan, asa Debata naung patuduhon holong ni roha na mambahen jolma gabe hasoloan ni rohaNa, nang jolma i pe tongtong ma barani dohot manjamothon ngolu na mambahen Debata gabe hasudungan ni rohana.
2. Ro do angka na uli na denggan di angka na manghalomohon hata ni Debata (11-13)
Perubahan besar na masa ima salpu partaonan ngali ni ari, mansohot ari udan, gabe mullop bungabunga di ladang, tarbege soara anduhur titi. Pangontak ni dosa na mambahen rimas ni Debata dipatudos do i songon ngali ni ari, dohot ari udan na mambahen na so adong hangoluan di angka suan-suanan dohot monjab angka pidong di asarna ala mabiar pangontak ni udan dohot ngali ni ari i. dipanghilalahon bangso Israel do rimas ni Debata na mambahen nasida gabe tarbuang, jala dao sian panatapan ni Debata. Ndang tarbahen ni bangso i paluahon dirina. Habubuangnasida i gabe mandate nasida jala manjalo reherehe sian bangso sileban naung pagosagosa nasida. Ende si Salomo patuduhon asa ganup jolma menyadari dirina molo holang sian adopan ni Debata, molo mangalaosi uhum manang hata ni Debata. Hubungan na denggan i boi gabe holang jala mandao jala uhum ni Debata ma na masa. Alai ianggo Debata dipatuduhon do hasatiaonNa sian mulana na tongtong dibagasan holong ni rohaNa asa tu dengganna ngolu ni jolma. Dibagasan holong ni roha ni Debata adong do hamubaon (perubahan besar dan total), masa ma muse hubungan na denggan, surak-surak, olopolop, keharmonisan satu dengan yang lainnya, ala nunga be adong roha na marsiantusan angka dia ma na laho sihasiholan ni roha ni ganup. Debata sai dihasiholi rohaNa do hita unduk mangulahon dohot mangahalomohon hataNa, nang hita pe naeng ma songoni asa dapotan parbue hita di hangoluan na pinadiri ni Jesus, ima hangoluan. Setiap orang yang merindukan tindakannya selalu mengikuti firman Tuhan maka akan terjadi perubahan besar dan secara total dalam kehidupannya. Tidak ada lagi rasa duka, karena sudah digantikan dengan sukacita.
HAHONAAN
Ndang adong na boi manirang hita sian haholongan ni Debata. Dibagasan Jesus Kristus nunga dibahen pardamean dohot pardomuanta dohot Ibana. Ido patandahon tu hita jolma na ingot Debata disangkapNa manghaholongi jolma on, nanggo sada unang adong na mago. Tung masihol do roha ni Debata asa ganup hita manghasiholi di parjumpangan na rosu di angka parsaoranta laho mambege soaraNa. Soara ni Debata na marisihon na dibagasan roha ni Debata na laho sihangoluhononta, naeng ma saluhutna hita gabe jolma na sai tongtong mangalehon partingkian na arga situtu laho mangulahon lomo ni roha ni Debata. Di zaman na mansai canggih (modern) on boi do mangurupi hita di ragam ni aplikasi asa mananda halomoan ni roha ni Debata siulahononta. Allah yang mampu mengatasi segala batas ruang dan waktu manusia, menunjukkan kasihNya yang mencintai manusia agar beroleh hidup yang kekal. Dia akan melakukan segala cara dengan caraNya sendiri di dalam rencana keselamatan itu untuk menjadikan kita selalu menjadi manusia yang berharga dan kesukaan hatiNya. Alani, naeng ma gabe huria na sai tongtong manghasiholi parsaoranta hita saluhutna, asa taboto jala boi taparguruhon hata ni Debata. Amen. (kssm)
Posting Komentar