Jamita Minggu 1 Desember 2024 Minggu Advent I tarsurat di Evangelium Lukas 21 ayat 25 - 36. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Dungo huhut Martangiang." Rap ma hita mangihuthon hatoranganna.
Pendahuluan
Masuhanta ma muse taon baru parhuriaon, Adven na parjolo. Hata adven on marharoroan sian hata Latin, i ma "Adventus" lapatanna "Kedatangan" (Indonesia), "Haroro" (Batak). Boi ma talapati ia Minggu Adven, i ma Minggu panomunomuon di haroro ni Kristus. Parjolo, panomunomuon di ari haroroNa na paduahalihon (Eskatologis), na paduahon i ma panomunomuon di ari parningotan hatutubu ni Sipalua i na gabe jolma. Minggu Adven Parjolo dohot na paduahon mangarahon mata ni haporseaonta manomunomu ari haroroNa na paduahon, jala Adven na Patoluhon dohot na Paopathon mangarahon mata ni haporseaonta tu panomunomuon di ari parningotan hatutubuNa, na gabe jolma di huta Betlehem lobi hurang di 2000 taon naung salpu.
Hombar tu lapatan ni Adven i, dienet do sian Hata ni Debata na gabe turpuk ni Jamita, i ma Jamita ni Tuhan Jesus uju di dolok Jetun. Dijamitai angka siseanNa taringot tu ari haroroNa na paduahalihon. Asa diharingkoti angka sisean i paradehon diri, asa dungo jala hobas laho manomunomu ari haroroNa, ndang dipaboa partingkianna, alai na pasti di sada tingki ingkon ro do Ibana. Jamita na marrumang "nubuat" manang panurirangon on tong do sahat tu hita di partingkian si nuaeng on, tu hita na gabe ruasNa. Disosoi do nang hita di ombas on asa sai dungo mardongan tangiang jala hobas. Sotung rarlalap binahen ni hinauli ni portibi on, laos tarihut jala tarihot, ujungna gabe madabu tu dosa. Gabe uhum nama jambarna di ari haroroNa, di ari panguhuman i.
Pembahasan
Dipaboa Tuhan Jesus do di turpuk on angka na naeng masa di ari haroroNa. HaroroNa napaduahalihon i dipatujolo marhire angka tanda di mata ni ari, bulan dohot bintang; nang angka tanda na gabe hapusohan ma angka bangso jala bobonosan bahenon ni gasak ni laut i dohot galumbangna. Marhite angka tanda on dipaingot Tuhan i angka sisean i tu sada situasi nang kondisi na luar biasa. Hamamasa na luar biasa on manghorhon dua panghorhon. Panghorhon na parjolo, adong jolma gabe tarhatos binahen ni hatahutonna. Panghorhon na paduahon, i ma na dipangido sian angka na porsea i ma asa dirgak, pasindak ulu, ala nunga jonok haluaon i.
Marhite panurirangion ni Tuhan Jesus di JamitaNa on, ia haroroNa na paduahalihon i sada kepastian na ingkon masa do. Nang pe ndang dipabotohon sadihari taon, bulan nang arina. Holan angka tanda do dipabotohon jala haradeonta di panomunomuon di haroroNa na paduahalihon i do na rumingkot. Isarani asa sai dungo mardongan tangiang. Turpuk Lukas 21 : 25 - 33 sarupa do dohot na tarsurat di Mateus 24 : 29 - 35 nang di Markus 13 : 24 - 31. Sian tolu naung disurathon di Evangelium on sada tanda do on paboa sada Jamita ni Jesus na mansai arga situtu do on na ingkon peopon jala sai dipahusorhusor di pardalanan ni ngolunta.
Pandohan "Anak ni Jolma i" na nidok ni Jesus di turpuk ni Jamita on, mandok diriNa do i. Haroro ni Anak ni Jolma i dipatorang di turpuk on ndang adong na umbotosa taringot tu arina. Songon na didok di Mateus 24:36, "Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i." Hahomion do taringot tu ari haroro ni Tuhan Jesus na paduahalihon i, alai dilehon do na gabe tanda. Asa marhite angka tanda i ma laos paingothon hita di ringkot ni pangaradeon diri.
Boi do dibandinghon songon parsiajaran di angka parsingkolaan, molo naeng mapultak simanabung sai jumolo do ditandai marhite masa lalo, angka mijur binatang sian tor i jala tamba mohop ni alogo humaliang ni tor i. Molo masa angka tanda si songon i migor hobas ma laho sumisi tu inganan na asing mangalului parlinggoman. Suang songon i ma na digombarhon taringot tu haroro ni Tuhan i. Alai angka tanda na tarsurat di buku Evangelium Lukas on ndang boi gabe parhitean ni jolma laho mambahen paretongan laho manontuhon ari hasusuda ni portibi on.
Dibahen Jesus do sada umpama asa ummura antusan ni angka sisean i lapatan ni Jamita taringot haroroNa na paduahalihon. I ma umpama taringot hau ara, borhat sian pengalaman ngolu siapari ni angka partani. Umpama na mamboan pamingkirion ni angka sisean i tu hamamasa naung ditanda nasida, isara ni pergantian musim (partaonan las). Di angka partani tontu mamoto do partingkian na une molo maeng marsuan, manggotil dohot na asing. Jala angka na masa tu angka suansuanan i, isara ni ombas martunasi, marmutik, angka dekdek bulungna.
Borhat sian hangongolu ni hau ara on, adong sada parsiajaran na arga na boi putihon. Molo pinarateatehon hau ara uju martunas, botoon ni partani ma na lam jonok ma ari partaonan las. Asing sian partunason i, na ringkot muse pinarateatehonon i ma parbuena. Ia parbue ni hau ara sasintongna ndang mardai. Alai molo denggan do dipauneune/diolah parbuena i, dipatupa gabe siinumon (minuman jus) boi ma gabe tabo daion. Sian proses manghobasi parbue ni hau ara on boi do idaonta ia hamubaon i ndang mambahen substansina gabe malala, alai lobi sian i lam patoguhon karakterna. Proses transformasi ringkot do di hau nang parbue ni hau ara, ala hau ara nang parbuena ndang boi memformat dirina sandiri secara maksimal. Suang songon i do nang ngolu ni jolma na porsea i, ingkon adong do proses transformasi laho maningkathon kualitas ni ngoluna.
Angka partani hau ara on, i ma pihak na mengintervensi hau nang parbue ni hau ara i. Angka partani on ma gombaran ni angka sisean i, nang angka na porsea. Partani na sukses ingkon adong do di ibana parbinotoan taringot tu ngolu ni suansuanan, taringot tu tano, iklim dohot na asing. Ingkon ringgas mamatamatai angka na sinuanna, na niulana. Asa molo songgop isara ni panahit boi pintor sigop laho mangubati. Lapatanna partani ingkon adong do roha na sai hobas, dungo laho mamarateatehon angka na niulana (songon hata ni na tuatua: "Mata guru, roha sisean." Diarahon Jesus do angka sisean nang hita pe marhite turpuk jamita on asa songon pangalaho ni partani i ma hita. I do sada hataridaan ni pangaradeon di dirinta, na sai dungo hita mardongan tangiang di na manomunomu haroro ni Tuhan Jesus na paduahalihon i.
Gombaran ni hau ara na martunas di turpuk on, marhahonaan tu ombas taon parasi ni rohaon, gok pasupasu (patudos Joel 2:22), jala ndang marhahonaan tu hamagoan manang hageneon. Umpama ni Tuhan Jesus di turpuk on mangondolhon hagogok ni panobusion ni Tuhan i, na digohi uju haroro ni Tuhan Jesus na padua halihon. Nang panurat ni Evangelium Marteus dohot Evangelium Markus pe mandok hamamasa ni hamamago, isara ni haleon nang lalo na gogo gabe sada tanda patujolo ni pambebeon i dope (Mateus 24:8, Markus 13:8), alai panurat ni Evangelium Lukas ndang manurathon i. Panurat ni Evangelium Lukas paandarhon jamita ni Jesus di bagasan sada pangantusion panghirimon na gok las ni roha, patudos Lukas 21: 28 "Alai molo mamungka masa angka i, dirgak ma hamu; pasindak hamu ma ulumuna, ai nunga jonok halusonmuna."
Umpama ni Tuhan Jesus on marujung marhite hata "Salpu pe sogot langit dohot tano on, anggo hatangKi na so tupa salpu!" Lapatan ni hata on, ia Jamita ni Tuhan Jesus on molo pe sada panurirangion nunga digohi di tingki naung salpu, (isarani hamamago ni bagas joro na di Jerusalem binahen ni soldadu Rom di taon 70 M). Jamita na marrumang panurirangion on tong do marlaku sahat tu partingkan si sonari sahat tu ari haroro ni Tuhan i, na paduahalihon. Haroro ni Kristus na paduahalihon, panghorhonna tu angka jolma na sai mangolu di bagasan dosa, gabe ari pamaloson/hamamago ma i. Alai di angka na satia manghaporseai Jesus, gabe ari na gok las ni roha, ari haluaon na gok.
Hombar tu naung nidok ni Tuhan Jesus na so adong nanggo sada jolma na mamoto andigan haroro ni Tuhan i, siala ni i diondolhon Tuhan Jesus di turpuk jamita on asa adong pangaradeon ni diri, i ma hadungoon. Hadungoon laho manomunomu haroroNa i marhite na sai ringgas manjaha, manangihon nang pahusorhusor Hata ni Debata, di panggulmiton ni ngolu siap ari. Molo dung songon i, tarida ma haporseaon nang ngolu naung marhaimbaruon. Di angka jolma si songoni gabe dao ma biar, ganggu nang lomos ni roha. Boi manahan marlohon angka hinauli ni portibi on, na boi manaiti roha ni jolma i gabe tarlalap di hasonangan na so marimpola, laos madabu tu hadosaon. Ala somal do molo godang sinamot ni jolma, mamora dohot na asing, boi talpe tu pasonangsonanghon pardagingon, isara ni parmabukon, parmainanon dohot na asing. I do na ingkon sipamanatonta, asa di tingki parasian on huhut na paimaimahon haroro ni Tuhan i, asa sai hot hita marhaporseaon na togu, dungo mardongan tangiang.
Kesimpulan dan Refleksi
Sian jamita ni Tuhan Jesus di dolok Jetun on, sotung madabu jolma laho mambahen paretongan manontuhon ari haroro ni Tuhan na paduahalihon. Nunga adong pigapiga halak na manguji mambahen paretongan, parjolo sahalak na margoar William Miller (Parjamita sian Huria Baptis) mandok haroro ni Tuhan i, i ma antara 21 Maret 1843 dohot 21 Maret 1844, adong hirahira 100.000 halak na mangihuthon ibana. Pola sampe digadisi sude artana. Paduahon, sahalak na margoar Charles T. Russel (na pajongjong Sekte Saksi Jahowa) ia haroro ni Tuhan i, i ma di taon 1914. Patoluhon, sahalak na margoar Harold Camping (Pandita sian The Family Radio) marhite channel You Tube mandok haroro ni Tuhan i, i ma ari 21 Mei 2011, pukul 6 sore. Didok ibana hira 3% sian jolma na diportibi on (+/- 207 juta) langsung manaek ma tu banua ginjang. Tung sada sian angka na mangetong angka ari i tung so adong na terbukti. I do umbahen didok Apostel Paulus di 1 Tessalonik 5:2, ia haroro ni Tuhan i songon panangko borngin do. Ndang adong na boi mamprediksi.
Na ringkot marhite Jamita ni Tuhan Jesus on, asa tongtong tapamanat sude angka na masa na niadopan ni angka jolma na porsea i boi lam patoguhon haporseaon, panghirimon nang patuduhon holong na sian Tuhan i. Sipata adong masa angka hal na luar biasa, adong lalo na mansai gogo, adong hagunturon parporangan di angka bangso, masa nang pandemi Covid-19 piga taon naung salpu. Saluhutna angka na masa i naeng ma mamanghulingi haporseaonta asa lam tapasolhot dirinta tu Tuhan i, asa unang madabu tu ganggu nang lomos ni roha. Jolma na sai lomos jala ganggu i ma hataridaan na hurang pos rohana di Tuhan i. Laos mura do angka jolma si songon i tartait tu angka tahi ni sibolis na boi manegai ngoluna.
Marhite turpuk ni Jamira on dipatorang Tuhan Jesus, ia masa pe angka tanda songon patujolo ni haroro ni Tuhan i, ndang na asa mambahen hita tahutan, alai asa disungguli do haporseaonta, asa sai dungo mardongan tangiang hita di na manomunomu ari haroro ni Tuhan i na paduahalihon. Manang sadihari pe masa i hombar tu tingki na binuhul ni Debata Ama i. Rajuman ni angka na porsea ma ari i songon ari na gok las ni roha, ai disi ma digohi Tuhan i haluaon na gok tu angka na satia mangihuthon Kristus i saleleng ngoluna. Sai rade ma hita managam haroro ni Tuhan i laho manggohi haluaon sipasahatonNa tu hita. Amen.
Posting Komentar