Jamita Minggu 9 Maret 2025 Minggu Invocavit tarsurat di Rom 10 ayat 16 - 21. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Sian na Tumangihon do Ro Haporseaon." Rap ma hita mangihuthon hatoranganna.
Pendahuluan
Huria Rom i ma Huria na niinganan ni angka halak Kristen diaspora, i ma halak Jahudi (4:1; 7:4-6) dohot Junani (1:5,13; 11:13), na ro sian ragam ni luat. Jadi, huria Rom ndada huria na pinajongjong ni Apostel Paulus, alai na jongjong marhite halak Jahudi diaspora na ro tu Jerusalem (peziarah). Huta Rom i ma na gabe pusat panggomgomion Kesar Rom. Surat on digurithon si Paulus hirahira di taon 56 M di tingki marbarita na uli ibana di luat Korint, laho "memberikan karunia rohani" (1:1; patudos Ulaon ni Apostel 8:14-18; 2 Timoteus 1:6). Surat on ditongos tu huria Rom marhite si Tertius (16:22) andorang so sahat tu Spanyol, jala targoar do surat on Magnum Opas (masterpiece/karya agung) ala pamusaton ni poda (teologi) ni Apostel Paulus do surat na tu huria Rom on.
Halak Kristen na di huta Rom mangadopi ragam ni parasingan sian budaya dohot ugamo. Sian sosial budaya, i ma mangihuthon budaya Rom na hierarchis, na tandi di parasingan induk somang (tuan) hatoban, etnisitas (kelompok-kelompok suku), parporangan laho maralohon angka na so sa-kelompok/ugamo. Di huta Rom na ro sian ragam ni pangisina na sian hatoban, angka na sangap, na mamora, penguasa politik, militer, parboniagaan (pengusaha), lam tandi ma parasingan ni sosial kemasyarakatan i.
Di taon 49 M masa do pangaleleon tu halak Kristen Jahudi sian huta Rom ala ni hagunturon ala ni pangantusion taringot tu Krestos. Hape "minoritas" do bilangan ni Kristen hatiha i (hirahira 200 halak). Di ragam ni na masa i do umbahen lam bidang do parasingan ni halak Kristen Jahudi dohot Junani.
Di tongos si Paulus surat on, marbingkas do i adong parsoalon dohot parsalisian di halak Kristen na di Rom ala ni angka marimbar pangantusion di haporseaonnasida di Jesus Kristus. Masa do angka parbolatan di nasida na sai mangasahon hasumurunganna be, na mambahen gabe martamba angka parungkilon di haporseaonnasida. Tarlumobi ma di turpukta on mangondolhon haporseaon na ro sian na tumangihon, i ma sian Hata ni Debata. Molo tung pe ragam angka pangajaran na ro tu luat Rom na naeng manegai hapolinon ni haporseaon tu Tuhan Jesus Kristus, alai molo na tangi do nasida tu Hata ni Debata, dihangkamma saluhutna parsaoran dohot haporseaon na sintong i laho paumbukhon dohot patanakhon hagogoon ni na mian di bagasan Hata ni Debata.
Pembahasan
Manangihon, Mangoloi huhut Manghaporseai (ayat 16)
Parjolo do dipatolhas tona manang Hata ni Debata na marisihon haluaon i tu Bangso Israel, jala singkop do saluhutna i dipasahat, alai ndang manjangkon. Sian bilanganna, patuduhon gumodang do na so manjanghon, sian bangso na targoar bangso na pinillit ni Debata. Manjalo (hupekousan) ndada holan na manangihon sambing, alai huhut do mangoloi jala manghaporseai. Ala ni i do ndang dapot hasisingkop ni na manjou tu Debata, na so olo manangihon Debata/manangihon Kristus (ayat 14; patudos Johannes 10:3-5; 18:37), jala ndang dapot haporseaon di nasida tu Jesus Kristus. Apostel Paulus patuduhon pangalaho na so manjangkon barita haluaon i pe nunga diarsakhon panurirang Jesaya (Jesaya 53:1), nang pe naung patar dipataridahon Debata hagogoon ni HataNa. Ndang tarbahen ni bangso i laho parataratahon pangoloion dohot panghaporseaonna tu Debata, ala naung jumolo nasida papilit sipareon nang parnidaanna.
Gabe sada sipatudu ma on nang di Padan na Imbaru i ma halak Jahudi (bangso Israel) na so manjangkon huhut manghaporseai Jesus, Hata ni Debata naung gabe jolma songon hataridaan naung pinarbagabaga ni Debata haluaon i tu bangso i. Nunga dibagabagahon haroro ni Mesias i marhite angka Panurirang, alai ala ndang tangi nasida jala ndang diungkap rohana disi umbahen ndang tarbahen nasida manjalo haroro ni Jesus na sian Nazareth gabe Sipalua di nasida.
Halak na ungkap roha tumangihon Hata ni Debata do na boi marpangoloion huhut manghaporseai angka Jamita ni Parbarita na Uli laho padasiphon haporseaon na polin tu Tuhan Jesus Kristus. Sian on tarida do molo pinajolo pangantusion na sian diri sandiri, ndang boi roha i inganan panjaloan ni Barita na Uli i. Ala ni i naeng ma tangkas hita paimbaru roha, marroha na unjur, jala jolma na olo asa gokan ni Hata ni Tuhan i, asa jumpang di hita roha na marpangoloion jala na polin marhaporseaon.
Sian na Tumangihon Hata ni Kristus do Ro Haporseaon (ayat 17)
Tangkas do diondolhon taringot tu huaso na tumangihon, mamungka sian na ruar bangso Israel sian Misir tung tangkas do disoarahon Debata asa tangi bangso i di soara (Hata) ni Debata asa saut nasida malua jala tolhas tu tano na pinarbagabaga i. Sian na tumangihon i do asa ro pangaradotion di Hata ni Debata, dung i gabe hasian ma nasida di adopan ni Debata. Molo naung tangi do bangso Israel jala diradoti nasida saluhutna i gabe tarjalo nasida do hamonangan i laho manaluhon hamusuon ni nasida (2 Musa 19:5; 23:22; 5 Musa 27:10). Tuhan Jesus pe mandok: "Martua ma angka na umbege Hata ni Debata jala na umpeopsa" (Lukas 11:28). Molo naeng targoar do bangso i gabe bangso na mangihuthon Kristus na marharoroan do i sian na manghajugulhon manangihon Hata ni Debata (Kristus).
Manangihon (akoe) dison naeng patuduhon pamusaton ni saluhutna ngolu asa tu Hata ni Kristus, ingkon adong do roha na ias, roha na serep jala uasan marsiajar na sian Hata ni Kristus. Huta Rom naung marragam angka pangajaran ala ni hamajuon i mambahen nasida boi "mardua roha" di Barita na Uli na binoan ni Apostel. Alai ngolu naung dilehon asa unduk tumangihon Hata ni Kristus i do boi lam antus pangantusion huhut marpangalahohon songon na tinonahon na sian Hata ni Kristus i. Sian na tumangihon Hata ni Kristus ro haporseaon, naeng tangkas do haporseaon na marparbue. Ndada holan ringkot ni na targoar naung Kristen, alai huhut do i naeng marparbue hakristenon marhite haporseaon na gabe papatarbon sinondang dohot sira di portibi on (Mateus 5:13-16). Haporseaon i patauhon hita asa polin marhaposan tu Kristus. Haheheon ni Kristus ndada holan patuduhon Ibana do Tuhan tu diriNa sandiri (1:4), alai Ibana do Tuhan di hita jolma. Naung gabe Tuhan tu saluhut jolma, laho mangarahon hita asa marsigantung tu Ibana ala ni hagaleonta laos tu Ibana ma pamusatan ni panjouon ni haporseaon i (10:13).
Parbaritanaulion na sian Hata ni Kristus maningtinghon haluaon i tu saluhut jolma alai haporseaon di bagasan Kristus ma parbue ni na tumangihonsa. Jamita (parjamita dohot na jinamitahonna), Tuhan i do na marsuru; alai molo tung ditangihon hata ondeng, haporseaon ma parbuena, jala dung porsea na tumangihon Hata ni Kristus i, laos disi tangkas panandaonna paboa Tuhan i maniop tanganna sahat tu na pasauton ni Kristus i haluaon di ibana.
Siulahonon ni na Tumangihon Hata ni Kristus jala Parbuena (ayat 18-21)
Dipaborhat Debata do angka parbarita na uli mamungka sian Padan na Robi, asa ganup jolma na so porsea di mulana, di na tangi nasida disi gabe porsea, dung i mamuji Tuhan huhut manjalo haluaon i laos gabe sitindangi. Alai songon naung dipaandar ndang sude na manjalo Barita na Uli umbahen ndang di nasida haluaon i. Diondolhon do hagogoon ni Hata ni Debata naung ditangihon i do mambahen jolma manjalo haluaon jala tarbahensa marhamubaon. Sasintongna, ndang hapalang las ni roha dohot hatuaon ni bangso Israel na manjalo Hata ni Debata tarlumobi manjangkon Mesias, Hata ni Debata naung gabe jolma i. Ganup bangso naung manjalo Kristus i do masa hadameon tu dirina sandiri nang tu angka bangso di portibi on (Epesus 2:13-17).
Kesimpulan dan Refleksi
1. Dengganan do na tumangihon sian na gumodangan manghatai (patudos Jakobus 1:19). Jala lam dasip ma naung tinangihon i molo gabe marpangoloion di bagasan hundukon tu Tuhan i huhut ma i polin marhaporseaon. Ingkon adong do roha na ias, jala olo dipatureture di bagasan Hata ni Kristus mangonjar hita asa hibul manangihon Hata ni Tuhan i. Ingkon rajuman do godang hatuaon sijaloon sian na tumangihon Hata ni Tuhan. Ala ni i unang tulak Hata ni Debata na ro tu hita.
2. Marhagogoon do hata ni Kristus i laho manghamonangkon hita asa paimbaru diri. Na manangihon hata ni Kristus ndada holan marhite sian siparcon sambing, alai ingkon do sian roha na ungkap, dungi jumpangan ma hita di hasisintong ni hata ni Kristus i. Laos sian on do boi patolhashon ganup halak Kristen na porsea tu Kristus gabe sitindangi Kristus.
3. Tajamothon ma parsaoranta si ganup ari, asa parsaoran na polin jala marhabadiaon. Dungi sian i ma tarida parbuena di tonga-tonga ni ngolunta si ganup ari, ima roha na marhadameon tu ganup jolma. Amen.
Posting Komentar