Jamita Partangiangan Epistel Minggu 9 Maret 2025 Minggu Invocavit tarsurat di buku Ester 5 ayat 1 - 8. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Sian na Tumangihon do Ro Haporseaon." Rap ma hita mangihuthon hatoranganna.
Pendahuluan
Tarbarita do si Ester sahalak parompuan na barani jala berjiwa nasionalisme laho paluahon bangsona (Jahudi) sian angka tahitahi hajahaton na naeng mamunu saluhut bangso Jahudi (genosida). Hatiha i harajaon Persia adong di panggomgomion ni Raja Serses I, jala disi do masa sangkap genosida on (hirahira taon 485-465 andorang Kristus). Marhite na dipamasa di Persia sada sayembara laho mamillit pangganti ratu Wasti naung marujung ngolu. I ma parmulaan ni si Ester gabe dalan haluaon di bangso Jahudi. Angka pangaradeon dohot pangajaran ni si Mordahai tu si Ester gabe tarpillit ma ibana gabe ratu. Dung gabe ratu ibana, ndang gabe paholang diri si Ester sian sangkap na naeng sipatupaon ni Debata. Baliksa laos i do gabe mambahen roha memperjuangkan bangsona sandiri naung disangkapi ingkon dipamate. Dipangke Debata marragam dalan laho paluahon bangsoNa. Tangkas do dipatuduhon si Ester roha na sai mananginangi huhut manat di pardalanan ni ngoluna asa tulus sangkap ni Debata.
Pembahasan
Mangulahon na Denggan Laho Patolhashon Sangkap ni Tuhan (ayat 1-2)
Sangkap na roa binahen ni si Haman laho pamatehon bangso Jahudi i mangonjar roha ni si Ester laho mangalehon dirina patolhashon sangkap ni Debata paluahon bangsoNa. Nunga dilehon Debata dalan tu si Ester marhite na pinabangkit ni raja i ibana gabe ratu manggantihon si Wasti. Alai dung dilehon huaso i di ibana laos disi do dilehon dirina hapapatar ni sangkap ni Tuhan. Laos disi do dilehon Debata tu ibana hapantason ni roha dohot bisuk asa boi manubut roha ni raja Serses i. Asa ndada sian hadirion na dipangke, alai tung tangkas do huaso i dalanna laho paluahon bangso Jahudia sian pamunuon. Huaso, hamuliaon, sangap ni hajolmaonna dipangke si Ester dalan paluahon bangso Jahudi.
Bisuk ni si Ester, jumolo ibana jongjong di alaman parbagasan mardonokhon jabu ni raja, dung pe disurdukhon raja i tungkot harajaon sere na di bagasan tangan ni raja i asa didapothon ma raja i. Haporseaonna maradophon Debata mamanghulingi roha na bulus i asa diulahon mambahen lomo roha ni raja i, asa saut na di bagas rohana. Pasauthon sangkap ni Tuhan i do lomo ni rohana, i ma na nionjar ni haporseaon na polin tu Debata. Jala denggan ma tapamanat. Ala naung jumolo do ditangihon si Ester sian si Mordahai aha na laho sipatupaonna lomo ni Debata, disi ma ibana barani jala mangulahon parsuruon i. Tangkas ma hagogoon ni na mananginangi asa binoto lomo ni Debata. Di na manangihon i do asa ro pangajarion na sintong laho siulahonon, laos disi ma soluk habisukon laho patupahon parsuruon ni Debata. Asa ndada sian parbinotoan dohot huaso ni hajolmaon sipangkeon laho pasauthon sangkap ni Tuhan, ingkon do sian roha na ias jala unduk (patudos Poda 3:5).
Habisukon ni Ester manaluhon huaso di hajolmaonna. Patut do nian sian hajolmaonna boi pangekonna songon ripe ni raja ibana, alai ndang dipatupa ibana i. Ingkon do saguru di pangajaran ni Tuhan. Sian na girgir manangihon i do ro ulaon na denggan, ai saurdot ma pangalaho hombar tu na tinangihon, i ma na sian hata ni Tuhan. Ndang tarbahen ni si Ester laho patupahon i molo sian hadirionna sambing, jala tung dia ma na boi sipangasahononna maradophon raja i? Ai sahalak na pinabangkit do ibana asa adong "sangap" i di ibana, molo so i ndang targoar ibana di sada harajaon. Asa molo tung pe dipaloas Debata hita laho manjalo tohap hasangapon di hajolmaon marhite huaso, jabatan dohot na asing, pangkeonta ma i gabe patolhashon sangkap ni Debata, patupahon na denggan i. Jala ingkon na denggan di Debata do, ndada na denggan di rohanta. Dia ma na denggan di Debata? Taboto saluhutna ala naung talehon do dirinta marsiajar tongtong tumangihon hata ni Debata dohot polin jala satia mananginangi.
Pajolohon Manangihon Soara ni Tuhan (ayat 3-5)
Songon tanda las ni roha ni raja i dipatolhas do sada bagabaga sipeopon ni si Ester: "Sahat ro di satonga harajaon i, ingkon lehonon do i tu ho." Sada dalan (peluang) na mansai balga do on molo tung ingkon pangkeon ni si Ester. Alai ndang apala i dope di roha ni si Ester siulahononna. Dung ro raja i dohot si Haman manolopi ontanganna asa ro tu sada panggalangon, i pe nunga sada halongangan bolon di roha ni si Ester. Dung i ingkon do ibana muse mangalehon dirina manangihon soara ni Debata na laho siulahononna na mangihut. Sukacitanya setelah raja memenuhi keinginannya tidak membuat dia lepas kendali, namun Ester semakin memberi diri untuk mendengarkan kembali suara Tuhan untuk langkah selanjutnya yang harus dilaksanakannya. On ma sada parbue ni haporseaon dohot haundukon maradophon Debata (patudos Psalmen 37:3-5; Poda 28:26; Jeremia 17:9; Mateus 26:33).
Tujuan na umbalga i do na ummarga di roha ni si Ester, ala ni i do dipaso hagiot ni rohana, marpingkir huhut manangihon tona ni Debata. Dumengganan do roha ni Debata mangarajai rohanta asa dapotan hita sangkap hatuaon dohot las ni roha naung pinarade ni Debata dingolunta. Hohom maradophon Debata huhut marpanalom di sangkap ni Debata (patudos Psalmen 27:14; 112:7), boi mambahen hita marhamonangan di na mangarajai diri. Dung i disi do rohanta mangalehon asa tongtong dirajai Debata. Pasahathon diri tu Debata asa dirajai, jala dipature Ibana dalan si dalanan, i do na dumenggan di ngolunta (Psalmen 37:1).
Boasa ma ingkon ontangon ni si Ester muse raja i rap dohot si Haman tu ari na mangihut? Dison dipatuduhon si Ester do paboa ingkon di partingkian ni Debata do asa tulus saluhutna. Di naung tinangihonna soara ni Debata, disi ma ibana lam umboto ingkon di partingkian ni Debata do, jala unduk do ibana disi, asa saut sangkap ni Debata paluahon bangso Jahudi. Tung tangkas do dipatuhon si Ester hadirionna, ingkon raphon Tuhan i do ibana asa tulus saluhutna. Sude ingkon saguru di Debata do asa sintong pangantusionta dohot haporseaonta. Unang ma dapot sian hita na pajolo gogo dohot parbinotoan, alai naeng ma jumolo disondangi marhite Hata ni Debata.
Martua do na Manangihon Hata ni Debata (ayat 6-8)
Marhite ngolu dohot na niula ni si Ester on patar ma huaso dohot holong ni roha ni Debata tu bangsoNa. Patulushon saluhutna sangkap ni Debata, dipatupa Ibana do ragam cara dohot mamangke ise pe na laho pasauthon. Dipabangkit Debata pe si Ester ala naung jumolo do dilehon diri, asa dipature Debata ngoluna, asa saluhutna na niulana marhite Hata ni Debata. Allah telah memproses kehidupan Ester, dibentuk dan diperlengkapi sedemikian rupa untuk menghadapi tantangan yang melebihi kemampuannya (patudos Psalmen 75:7-8).
Molo tung pe marpangoloion raja di hata ni si Ester, ndada ala sian hadirionna i, ala marhuaso do ganup hataNa, i ma Hata ni Debata na ingkon pasautonna marhite dirina. Asa molo tung pe tarpatupa hita sada ulaon jala berhasil, jala molo tung pe marroha pangoloion jolma di angka na taulahon, ndada na sian dirinta i, alai na mangula do Debata marhite dirinta. Asa ndang tarula hita agia aha molo so mardonganhon Tuhan i (Johannes 15:5). Aha do sipatupaon asa marparbue na taulahon i? Borhat ma marhite na jumolo hibul manangihon Hata ni Debata, unang mardua roha, jala tongtong mamelehon diri asa dipapatar Debata huasoNa marhite hita.
Kesimpulan dan Refleksi
1. Haboion, hamaloon di hajolmaon pangkeonta ma i patulushon sangkap ni Debata. Mamelehon diri asa hibul jala boi dirajai Hata ni Debata. Molo taadopi do pargulmiton ni ngolu dohot parporangan ni haporseaon (perjuangan iman), molo tapatujolo do dirinta, gok biar dohot ganggu ni roha do hita. Ala ni i do, aha do sangkap ni Debata na laho sipatolhasonta? Ingkon girgir do hita mananginangi Hata ni Debata. Radoti parsaoran na mambahen ture roha jala boi manopa roha na ias jala marpangoloion. Di dia do jumpangan hita i? Unang sirang rohanta sian parsaoranta na tumangihon Hata ni Debata.
2. Sipata jotjot do hagiot ni daging manaluhon lomo ni roha ni Debata. Masa do i tu angka na pajolo rohana sambing. Molo sintong do hita siihuthon Tuhan i, naeng ma hita jamot di haporseaonta, so tung adong na boi manegai. Unang tapaloas ala ni hagiot ni haportibion on gabe sega haporseaon i. Ala ni i taharinggashon ma manangihon Hata ni Debata, asa lam pita jala togu haporseoanta. Amen.
Posting Komentar